रायगड : जुन्या मुंबई-पुणे मार्गावर भीषण अपघात, सात जणांचा मृत्यू

जुन्या मुंबई-पुणे महामार्गावर भीषण अपघात झाला. या अपघातात पाच जणांचा जागीच मृत्यू झाला, तर दोन गंभीर जखमींचा उपचारादरम्यान मृत्यू झाला. एकविरा देवीच्या कार्लाजवळ स्विफ्ट आणि सेन्ट्रो कार एकमेकांना समोरासमोर धडकल्या. मुंबईहून पुण्याला जाणाऱ्या मार्गावर हा अपघात पावणे तीनच्या सुमारास झाला. अपघात किती भीषण होता, ते दृश्य पाहून लक्षात येतं. दोन्ही गाड्यांच्या समोरील बाजूचा चक्काचूर झाला. प्रथम दर्शनी तरी स्विफ्ट गाडीच्या चालकाचा ताबा सुटल्याने ती विरुद्ध दिशेला आल्याची दिसत आहे. लोणावळा ग्रामीण पोलीस याचा अधिक तपास करत आहेत. या अपघातानंतर पुण्याकडे येणारी वाहतूक बराच वेळ विस्कळीत झाली होती. वीकेंड असल्यामुळे मार्गावर मोठ्या प्रमाणात वाहनांची गर्दी आहे.