स्पेशल रिपोर्ट : बीड : लग्नात बूट लपवल्यावरुन वाद, नवरदेवाचं डोकं फुटलं, लग्नही मोडलं!

लग्नात मुलीकडच्यांनी नवरदेवाचे बूट लपवून त्याच्याकडून पैसे घ्यायचे, असा सध्याच्या लग्नातला ट्रेण्ड आहे. परंतु एका लग्नात बूट लपवण्यावरुन झालेल्या वादात चक्क नवरदेवाचंच डोकं फुटल्याची घटना आहे. बीडच्या केज तालुक्यातील कुंभेफळ गावात रविवारी हा धक्कादायक प्रकार घडला. महत्त्वाचं म्हणजे सासऱ्याने झालेलं लग्न मोडून आपल्या मुलीला तलाक घ्यायला लावला.

नेमकं काय घडलं?
सुलताना युनूस शेखचा नबी सिकंदर शेख यांच्या मुलीशी रविवारी निकाह होता. पण लग्नाआधी मुलीच्या भावाने नवरदेवाचे बूट लपवल्याने वाद झाला आणि त्याचं रुपांतर मारहाणीत झालं. मात्र सामोपचाराने हा वाद मिटला, लग्नही झालं.

पण लग्नाआधी घडलेल्या प्रकारावरुन पुन्हा वादाला सुरुवात झाली. वादावादी झाली. मग नवरदेवाने मुंडावळ्या आणि सेहरा काढून फेकून दिला. यानंतर नंतर जे घडलं ते अतिशय धक्कादायक होतं. कारण या हाणामारी नवरदेवाचं डोकं फुटलं आणि त्याला सहा टाके पडले. सासऱ्यानेच आपल्या हातातील लाकडाने नवरदेवावर वार केल्याचा आरोप आहे.