भारताचे माजी कसोटीवीर सुनील गावस्कर आणि दक्षिण आफ्रिकेचे माजी कसोटीवीर ग्रॅमी पोलॉक यांच्या हस्ते ही गदा टीम इंडियाला प्रदान करण्यात आली. टीम इंडियाला आयसीसीच्या वतीनं मानाची गदा आणि दहा लाख अमेरिकन डॉलर्स असं इनाम देण्यात आलं.
टीम इंडियानं सहा सामन्यांची मालिका 4-1 ने खिशात घातली होती. भारतानं दक्षिण आफ्रिका दौऱ्यात जिंकलेली ही वन डे सामन्यांची पहिलीवहिली मालिका ठरली.
आयसीसीच्या कसोटी आणि वन डे क्रमवारीत टीम इंडिया एकाचवेळी नंबर वन आहे. कर्णधार विराट कोहलीसाठी ही नक्कीच अभिमानाची बाब ठरावी.
पराभवांची मालिका
1992-93 साली भारतानं दक्षिण आफ्रिका दौऱ्यातली सात वन डे सामन्यांची मालिका 2-5 अशी गमावली. मग 2006-07 साली पाच वन डे सामन्यांच्या मालिकेत भारतानं यजमान दक्षिण आफ्रिकेसमोर 0-4 असं लोटांगण घातलं.
2010-11 साली पाच वन डे सामन्यांच्या मालिकेत भारतानं दक्षिण आफ्रिकेकडून 2-3 अशी निसटती हार स्वीकारली. 2013-14 सालच्या दक्षिण आफ्रिका दौऱ्यात भारताला तीन वन डे सामन्यांच्या मालिकेत 0-2 असा पराभव स्वीकारावा लागला होता.