कोलकाता : कोलकात्याच्या ईडन गार्डन्सवर रायझिंग पुणे सुपरजायंटने 4 विकेट राखून कोलकाता नाईट रायडर्सवर मात केली. सलामीवीर राहुल त्रिपाठीच्या शानदार 93 धावांच्या खेळीच्या जोरावर पुण्याने कोलकात्यावर सहजपणे मात केली.
या विजयासोबतच पुण्याने गुणतालिकेत तिसऱ्या स्थानावर झेप घेतली आहे. पुण्याने आतापर्यंत खेळलेल्या 11 सामन्यांपैकी 7 सामन्यात विजय मिळवून सनरायझर्स हैदराबादला मागे टाकत तिसरं स्थान मिळवलं.
कोलकात्याने पुण्याला विजयासाठी 156 धावांचं आव्हान दिलं होतं. कोलकात्याच्या फलंदाजांना या सामन्यात चमकदार कामगिरी करता आली नाही. कर्णधार गौतम गंभीर 24 धावा करुन माघारी परतल्यानंतर कोलकात्याचे सर्व फलंदाज स्वस्तात माघारी परतले.
मनिष पांडे 37, कोनील डी ग्रँडहोम 36 आणि सूर्यकुमार यादवच्या नाबाद 30 धावांच्या खेळीने कोलकात्याची धावसंख्या वाढवण्यास मदत मिळाली. मात्र कोलकात्याचे गोलंदाज पुण्याच्या फलंदाजांना रोखण्यात अपयशी ठरले.
पुण्याचा सलामीवीर अजिंक्य रहाणे 11 धावांवर माघारी परतल्यानंतर राहुल त्रिपाठीने स्फोटक फलंदाजी केली. त्याने 52 चेंडूत 7 षटकार आणि 9 चौकारांच्या मदतीने 93 धावा ठोकल्या.