PBKS vs SRH, IPL 2021 Highlights: चेन्नईमध्ये सुरु असलेल्या पंजाब आणि हैदराबादमधील सामन्यात हैदराबादनं पंजाबवर 9 विकेट्सने विजय मिळवला आहे. पंजाबच्या 121 धावांच्या आव्हानाचा पाठलाग करताना सलामीवीर डेव्हिड वॉर्नर आणि जॉनी बेअरस्टो यांनी दमदार सुरुवात केली. या दोघांनी पॉवरप्लेमध्ये हैदराबादसाठी 50 धावा केल्या. 11व्या षटकात फॅबिएन एलनने वॉर्नरला बाद करत पंजाबला पहिले यश मिळवून दिले. वॉर्नरने 3 चौकार आणि एका षटकारासह 37 धावा केल्या. वॉर्नर-बेअरस्टो यांनी 73 धावांची सलामी दिली.
त्यानंतर बेअरस्टो आणि केन विल्यमसन यांनी नाबाद भागिदारी रचत संघाला विजय मिळवून दिला. बेअरस्टोनं 56 चेंडूत 3 चौकार आणि 3 षटकारांच्या मदतीनं 63 धावा केल्या. तर विल्यमसननं 19 चेंडूत 16 धावा केल्या.
त्याआधी हैदराबादनं पंजाबला 120 धावांमध्ये रोखलं आहे. पंजाबचा संघ 120 धावांवर ऑलआऊट झाला. प्रथम फलंदाजी करताना पंजाबची सुरुवात चांगली झाली नाही. केएल राहुल केवळ चार धावांवर बाद झाला. तर मयंक अग्रवाल 22 धावांवर बाद झाला. 6 षटकात पंजाबने 32 धावा फलकावर लावल्या. पॉवरप्लेनंतर मयंक बाद झाला. खलील अहमदने त्याला (22) झेलबाद केले. अग्रवालनंतर आलेला निकोलस पूरनही शून्यावर धावबाद झाला. राशिद खानने ख्रिस गेलला पायचित करत पंजाबला मोठा धक्का दिला. गेलला केवळ 15 धावा करता आल्या. गेल बाद झाल्यानंतर पंजाबचा डाव सावरलाच नाही. दीपक हुडा 13 धावांवर तर मोझेस हेन्रिक्स 14 धावांवर बाद झाले. त्यानंतर आलेल्या शाहरुख खानने 2 षटकारांसह 22 धावा करत संघाला 100 पार पोहोचवले. मात्र तो 22 धावांवर बाद झाला. शाहरुख बाद झाल्यानंतर पंजाबच्या तळाच्या फलंदाजांनीही नांग्या टाकल्या. शेवटच्या षटकात मोहम्मद शमी धावबाद होताच पंजाबचा डाव 120 धावांवर संपुष्टात आला. हैदराबादकडून खलील अहमदने 21 धावांत 3, अभिषेक शर्माने 2 तर भुवनेश्वर कुमार, राशिद खान, सिद्धार्थ कौलनं एक एक विकेट घेतली.