IPL 2020, MIvsRR | अबुधाबीच्या मैदानात मुंबई इंडियन्सनं राजस्थान रॉयल्सचा 57 धावांनी पराभव केला. या सामन्यात मुंबईनं राजस्थानला 194 धावांचं आव्हान दिलं होतं. पण मुंबईच्या अचूक माऱ्यासमोर राजस्थानचा डाव 19.1 षटकात 136 धावात आटोपला. राजस्थानच्या जोस बटलरनं 70 धावांची खेळी करुन एकाकी झुंज दिली. मुंबईकडून जसप्रीत बुमरानं 20 धावात 4 फलंदाजांना माघारी धाडलं. तर ट्रेन्ट बोल्ट आणि जेम्स पॅटिन्सननं प्रत्येकी 2 विकेट्स घेतल्या.
मुंबईचा यंदाच्या मोसमातला हा सहा सामन्यातला चौथा विजय ठरला. तर राजस्थानला सलग तिसऱ्या पराभवाला सामोरं जावं लागलं. सूर्यकुमार यादवच्या नाबाद अर्धशतकाच्या जोरावर मुंबई इंडियन्सनं राजस्थान रॉयल्ससमोर 194 धावांचं तगडं आव्हान ठेवलं होतं. मुंबईनं प्रथम फलंदाजी करताना 20 षटकात 4 बाद 193 धावांचा डोंगर उभारला. मुंबईकडून सूर्यकुमार यादवनं 47 चेंडूत नाबाद 79 धावांची खेळी केली. त्यात 11 चौकार आणि दोन षटकारांचा समावेश होता. सूर्यकुमारचं यंदाच्या मोसमातलं हे पहिलच अर्धशतक ठरलं. याशिवाय कर्णधार रोहित शर्मानं 35 तर हार्दिक पंड्यानं नाबाद 30 धावा फटकावल्या.
कर्णधार रोहित शर्मा आणि क्विंटन डिकॉक यांनी मुंबई इंडियन्सला शानदार सुरुवात करुन दिली. या दोघांनीही पहिल्या विकेटसाठी 4.5 षटकांत 49 धावांची भागिदारी केली. डिकॉकने 15 चेंडूत तीन चौकार आणि एका षटकारासह 23 धावा केल्या. आयपीएलमध्ये पदार्पण केलेल्या कार्तिक त्यागीने त्याला बाद केले. त्यानंतर लेगस्पिनर श्रेयस गोपाळने दोन चेंडूंमध्ये सलग दोन विकेट घेतल्या. प्रथम त्याने रोहित शर्माची विकेट घेतली आणि त्यानंतर ईशान किशनला माघारी धाडलं. मुंबईचा डाव तीन बाद 88 धाव होता. परंतु तिसर्‍या क्रमांकावर फलंदाजीला आलेल्या सूर्यकुमार यादवने एक बाजू राखून मैदानात सर्वत्र फटकेबाजी केली. सूर्यकुमारने 47 चेंडूत नाबाद 79 धावा केल्या. त्याच्या अर्धशतकी खेळीत त्याने 11 चौकार आणि दोन षटकार ठोकले.
या विजयासह मुंबई इंडियन्सने पॉईंट टेबलमध्ये अव्वल स्थान गाठलं आहे. मुंबईचे सहा पैकी चार सामने जिंकत आठ गुण आहेत. तर राजस्थान रॉयल्स सातव्या स्थानावर आहे.