PBKS vs DC, IPL 2021 Innings Highlights: आयपीएलमधील दिल्ली आणि पंजाब यांच्यातील मुंबईच्या वानखेडे स्टेडियमवर खेळला गेलेला सामना दिल्लीनं सहा विकेट्सनं जिंकला आहे. सलामीवीर शिखर धवनच्या धडाकेबाज 92 धावांच्या खेळीच्या बळावर दिल्लीने पंजाबनं समोर ठेवलेलं 196 धावांचं शिखर सहज पार केलं. दिल्लीनं हा विजय मिळवून दोन विजयांसह गुणतालिकेत दुसऱ्या क्रमांकावर झेप घेतली आहे.
पंजाबनं ठेवलेल्या मोठ्या आव्हानाचा पाठलाग करताना पृथ्वी शॉ आणि शिखर धवननं चांगली सुरुवात करुन दिल्ली. 5 षटकात दिल्लीने अर्धशतक धावफलकावर लावलं. अर्शदीपने पृथ्वी शॉला 32 धावांवर बाद करत दिल्लीला पहिला धक्का दिला. पृथ्वीने 17 चेंडूत 3 चौकार आणि 2 षटकारांसह 32 धावा केल्या. त्यानंतर आलेल्या स्मिथला केवळ 9 धावा करता आल्या. स्मिथ बाद झाल्यानंतर धवनचं शतक हुकलं. तो 92 धावांवर बाद झाला. शिखरनं 49 चेंडूत 13 चौकार आणि 2 षटकारांसह 92 धावा केल्या. शेवटी कर्णधार ऋषभ पंत आणि मार्कस स्टॉयनिसनं सावध खेळी करत संघाला विजयाच्या जवळ नेलं. मात्र पंत 15 धावांवर बाद झाला. त्यानंतर ललित यादव आणि स्टॉयनिसनं विजयावर शिक्कामोर्तब केलं. स्टॉयनिसने 13 चेंडूत नाबाद 27 धावा केल्या.
या सामन्यात पंजाबनं पहिल्यांदा फलंदाजी करताना दिल्लीसमोर 196 धावांचं लक्ष्य ठेवलं होतं. पंजाबचा कर्णधार केएल राहुल आणि मयांक अग्रवाल यांनी धडाकेबाज सुरुवात करुन दिली होती. दोघांनी 122 धावांची सलामी दिली. सुरुवातीच्या 6 षटकात या दोघांनी 59 धावा केल्या. तर 10 षटकात पंजाबने 94 धावा केल्या. 13व्या षटकात मयांकने 36 चेंडूत 7 चौकार आणि 4 षटकारांसह 69 धावा करत बाद झाला. त्यानंतर राहुलही अर्धशतक केल्यानंतर 16व्या षटकात रबाडाच्या गोलंदाजीवर बाद झाला. राहुलने 7 चौकार आणि 2 षटकारांसह 61 धावा केल्या. राहुलनंतर आलेला गेल 11 धावांवर बाद झाला. पूरनलाही आज केवळ9 धावाच करता आल्या. दीपक हुडाने नाबाद 23 धावा केल्या. तर शेवटी शाहरुख खानने फटकेबाजीमुळे पंजाब 195 धावांवर पोहोचला. शाहरुख खाननं शेवटच्या षटकात दोन चौकार आणि एक षटकार लगावला.