CSK vs RCB, Innings Highlights : धडाकेबाज फलंदाजीनंतर गोलंदाजीतही सर रविंद्र जाडेजानं केलेल्या धमाकेदार खेळीच्या बळावर चेन्नईने बंगळुरुवर 69 धावांनी मोठा विजय मिळवला. फलंदाजी करताना 28 चेंडूत पाच षटकारांसह 62 धावा ठोकणाऱ्या रविंद्र जाडेजानं गोलंदाजी करताना 4 षटकात 13 धावा देत 3 विकेटही घेतल्या. तसेच एक गडी धावबादही केला. 192 धावांच्या आव्हानाचा पाठलाग करताना बंगळुरुला 20 षटकात 9 बाद 122 धावा करता आल्या. विजयासाठी दिलेल्या 192 धावांचं लक्ष्य गाठताना बंगळुरुची सुरुवात चांगली झाली नाही. पडिक्कलनं फटकेबाजी करत आशेचा किरण दाखवला. मात्र विराट कोहली 8 धावा करत बाद झाला.
यानंतरही वॉशिंग्टन सुंदरही चांगली कामगिरी करु शकला नाही. अवघ्या 7 धावा करून तो बाद झाला. तिसऱ्या षटकात एबी डिव्हिलियर्स 4 धावांवर बाद झाला. त्यानंतर पडिक्कल देखील बाद झाला. त्याने 15 चेंडूत 34 धावांची खेळी केली. बंगळुरुच्या अपेक्षा असलेला मॅक्सवेलही स्वस्तात बाद झाला. त्याने 22 धावा केल्या. जेमिसननं 16 धावांचं योगदान दिलं. चेन्नईकडून जाडेजानं 3 ताहिरनं 2 तर सॅम करन, शार्दुल ठाकूरनं एक एक विकेट घेतली.
Ravindra Jadeja : सर रविंद्र जाडेजा.. 5 षटकार, एक चौकार... हर्षल पटेलच्या एका षटकात 37 धावा
त्याआधी चेन्नईनं पहिल्यांदा फलंदाजी करताना 192 धावांचं लक्ष्य दिलं होतं. चेन्नईकडून रविंद्र जाडेजानं मुंबईच्या वानखेडे मैदानावर आज धावांचा अक्षरशा पाऊस पाडला. रविंद्र जाडेजाच्या तुफान फटकेबाजीच्या बळावर चेन्नईनं बंगळुरुसमोर 192 धावांचं लक्ष्य ठेवलं. रविंद्र जाडेजानं हर्षल पटेलच्या शेवटच्या षटकात पाच षटकारांसह 36 धावा वसूल करत संघाला मजबूत धावसंख्या उभारुन दिली. पहिल्यांदा फलंदाजी करताना चेन्नईचे सलामीवीर ऋतुराज गायकवाड आणि फाफ जोडीनं चेन्नईला चांगली सुरुवात करुन दिली. पहिल्या विकेटसाठी या जोडीनं 74 धावांची भागिदारी केली. यजुवेंद्र चहलनं ऋतुराजला बाद करत पहिला धक्का दिला. ऋतुराजनं 4 चौकार आणि 1 षटकाराच्या मदतीने 33 धावा केल्या. त्यानंतर आलेल्या सुरेश रैनानं फाफला साथ देण्याचा प्रयत्न केला. मात्र 18 चेंडूत 24 धावा करून सुरेश रैना बाद झाला. त्याने खेळीत 1 चौकार आणि 3 षटकार ठोकले. त्यानंतरच्या दुसऱ्याच चेंडुवर हर्षल पटेलनं फाफ डूला बाद केलं. त्यानं 41 चेंडूत 50 धावा केल्या.
त्यानंतर आलेल्या रविंद्र जाडेजानं तुफान फटकेबाजी केली. शेवटच्या षटकात त्याने हर्षल पटेलची चांगलीच धुलाई करत 5 षटकार आणि 1 चौकार ठोकत 37 धावा वसूल केल्या. हर्षल पटेलनं या शेवटच्या षटकाआधी तीन विकेट घेत चांगली गोलंदाजी केली होती. मात्र या शेवटच्या षटकात त्याच्या कामगिरीवर रविंद्र जाडेजानं पाणी फेरलं.