कोलकात्याचा हा नऊ सामन्यांमधला सातवा विजय ठरला. तर दिल्लीचा हा सात सामन्यांमधला पाचवा पराभव असून, झहीर खानचा संघ चार गुणांसह गुणतालिकेत तळाशी आहे.
ईडनवर झालेल्या लढतीत दिल्लीनं कोलकात्याला विजयासाठी 161 धावांचं आव्हान दिलं होतं. त्याचा पाठलाग करताना गंभीरनं 52 चेंडूंत 11 चौकारांसह नाबाद 71 धावांची भक्कम खेळी उभारली.
गंभीरनं रॉबिन उथप्पाच्या साथीनं दुसऱ्या विकेटसाठी 108 धावांची भागीदारी रचली. उथप्पानं 33 चेंडूंत पाच चौकार आणि चार षटकारांसह 59 धावा फटकावल्या.
त्याआधी संजू सॅमसनच्या 60 आणि श्रेयस अय्यरच्या 47 धावांच्या खेळींच्या जोरावर दिल्लीनं 20 षटकांत सहा बाद 160 धावांची मजल मारली होती. कोलकात्याचा गोलंदाज नॅथन कूल्टर-नाईलनं 34 धावांत दिल्लीच्या तीन फलंदाजांना माघारी धाडून आपल्या टीमच्या विजयाला हातभार लावला.