Ind vs SA : दक्षिण आफ्रिकेच्या सेंच्युरियन मैदानात (Centurion) भारत विरुद्ध दक्षिण आफ्रिका (India vs Sout Africa) यांच्यात पहिला कसोटी सामना सुरु आहे. सध्यातरी सामन्यात भारताने वर्चस्व मिळवलं असलं तरी विजय अजून दूर आहे. सामन्यात भारतीय खेळाडूंकडून उत्तम प्रदर्शन दिसत असलं तरी भारताच्या गोलंदाजीची सुरुवात झाल्यापासून एक व्हिडीओ बराच व्हायरल होत आहे. हा व्हिडीओ म्हणजे भारताचा युवा गोलंदाज मोहम्मद सिराज याचा. सिराज या सामन्यात विकेट घेतल्यानंतर आनंद साजरा करताना प्रसिद्ध फुटबॉलपटू ख्रिस्तियानो रोनाल्डोप्रमाणे अॅक्शन करत आहे. त्यामुळे सिराजचं हे सेलिब्रेशन सोशल मीडियावर व्हायरल होत असून अनेकजण हा व्हिडीओ शेअर करत आहेत. तर या व्हिडीओवर तुम्हीही एक नजर फिरवाच...



आतापर्यंत पार पडलेल्या सामन्यात सिराजने पहिल्या डावात एक विकेट घेतली आहे. तर दुसऱ्या डावात दक्षिण आफ्रिकेचे 3 गडी बाद होईपर्यंतही सिराजच्या खात्यात एक विकेट आहे. सामन्यात भारताने प्रथम फलंदाजी करत राहुलचं शतक, अगरवालचं अर्धशतकाच्या जोरावर 327 धावा केल्या. ज्यानंतर फलंदाजीला आलेल्या दक्षिण आफ्रिका संघावर सुरुवातीपासून भारतीय गोलंदाजांनी दबदबा कायम ठेवला. 197 धावांवर भारताने आफ्रिकेला सर्वबाद करत सामन्यावरील पकड मजबूत केली. ज्यानंतर 130 धावांची आघाडी घेऊन भारताने दुसऱ्या डावाची फलंदाजी सुरु केली. पण भारताचा एकही फलंदाज खास कामगिरी करु शकला नाही. केएल राहुलने सुरुवातीला टिकून खेळण्याचा प्रयत्न केला पण दुसऱ्या बाजूने विकेट जात असल्याने राहुलही 23 धावा करुन बाद झाल. मग पुजारा आणि कोहली खेळ सांभाळत आहेत, असे वाटत होते. पण तेव्हाच आधी पुजारा 16 आणि मग कोहली 18 धावा करुन तंबूत परतले. रहाणेही 20 धावाच करु शकला. ज्यानंतर ऋषभ पंतने अखेरच्या काही षटकात 34 धडाकेबाज धावा केल्या. ज्याच्या जोरावर भारताने 174 धावा स्कोरबोर्डवर लावल्या. ज्यामुळे आता दक्षिण आफ्रिकेला विजयासाठी 305 धावांची आवश्यकता आहे. 


हे ही वाचा-



LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha