Mohammed Siraj Air India Express cancels Guwahati-Hyderabad flight : भारत आणि दक्षिण आफ्रिका यांच्यातील दोन सामन्यांच्या कसोटी मालिकेतील दुसरा सामना गुवाहाटीच्या बरसापारा क्रिकेट स्टेडियममध्ये खेळला गेला. या सामन्यात आफ्रिकन संघाने तब्बल 408 धावांनी विजय मिळवत मालिका 2-0 ने खिशात घातली. मात्र सामना संपताच टीम इंडियाचा वेगवान गोलंदाज मोहम्मद सिराज सोशल मीडियावर चांगलाच भडकलेला दिसला आणि त्यामागचं कारण क्रिकेटशी संबंधित नव्हतं.
फ्लाइट उड्डाणात झालेल्या विलंबामुळे भडकला सिराज
गुवाहाटी कसोटीमध्ये प्लेइंग XI चा भाग असलेला सिराज सामना संपल्यानंतर थेट हैदराबादला रवाना होणार होता. यासाठी त्याने एअर इंडिया फ्लाइट IX 2884 बुक केली होती, ज्याचे उड्डाण वेळापत्रकानुसार सायंकाळी 7:25 वाजता होते. पण, फ्लाइट वेळेवर उडाली नाही. सतत विलंब होत राहिला. 4 तास उलटून गेले तरी अपडेट नाही. एअरलाइनकडून कोणतीही ठोस माहिती देण्यात आली नाही. यामुळे वैतागलेल्या सिराजने ‘एक्स’वर पोस्ट करत चांगलाच संताप व्यक्त केला.
मोहम्मद सिराज काय म्हणाला?
सिराजने लिहिले की, “गुवाहाटी–हैदराबाद एअर इंडिया फ्लाइट IX 2884 ला 7:25 ला उड्डाण करायचे होते. पण एअरलाइनकडून कोणतेही अपडेट नाही. सतत संपर्क साधूनही योग्य कारण दिले जात नाही. चार तास झाले, प्रवासी अडकले आहेत. मी खरंच कोणालाही या फ्लाइटने प्रवास करण्याचा सल्ला देणार नाही, जोपर्यंत हे लोक ठोस पावले उचलत नाहीत.”
सिराजच्या तक्रारीनंतर एअर इंडियाची प्रतिक्रिया
टीम इंडियाचा वेगवान गोलंदाज मोहम्मद सिराजने सोशल मीडियावर विमानाच्या विलंबाबद्दल संताप व्यक्त केल्यानंतर, एअर इंडियाने त्यांना प्रतिक्रिया दिली. त्यांनी कळवले की गुवाहाटीहून हैदराबादला जाणारी त्यांची फ्लाइट IX 2884, ऑपरेशनल कारणांमुळे रद्द करण्यात आली आहे. हे लक्षात घेण्यासारखे आहे की टीम इंडिया 30 नोव्हेंबरपासून दक्षिण आफ्रिकेविरुद्ध तीन सामन्यांची एकदिवसीय मालिका खेळणार आहे, ज्यासाठी मोहम्मद सिराज संघाचा भाग नाही.
हे ही वाचा -
Gautam Gambhir Video : पराभव होताच गौतम गंभीरला चाहत्यांनी मैदानात घेरलं; हाय... हायचे नारे; टीम इंडियाचे खेळाडू आले धावून, मोहम्मद सिराजने जे केलं...