Rohit Sharma 2027 World Cup Team India :भारतीय क्रिकेटमध्ये रोहित शर्माच्या भविष्यावरून मोठा पेच निर्माण झाल्याची चर्चा आहे. 2027 मध्ये होणाऱ्या वनडे वर्ल्ड कपमध्ये रोहित शर्मा खेळणार की नाही, या मुद्द्यावरून बीसीसीआय आणि निवड समितीच्या भूमिकांमध्ये मतभेद असल्याचे वृत्त समोर आले आहे. विशेष म्हणजे, रोहितच्या भविष्याबाबत निवड समितीने एक भूमिका घेतली असताना बीसीसीआय सचिव देवजीत सैकिया यांच्या एका वक्तव्यामुळे या प्रकरणाला वेगळेच वळण मिळाल्याचे सांगितले जात आहे.
रोहित शर्माने कसोटी आणि टी-20 क्रिकेटमधून निवृत्ती घेतली आहे. मात्र, वनडे क्रिकेटमध्ये तो अद्याप खेळत असून 2027 च्या वनडे वर्ल्ड कपपर्यंत भारतीय संघाचा भाग राहण्याची त्याची इच्छा असल्याचे यापूर्वी समोर आले आहे. त्यामुळे त्याच्या भविष्यासंदर्भात आता भारतीय क्रिकेटमध्ये जोरदार चर्चा सुरू झाली आहे.
लॉर्ड्स वनडेमुळे वाढला वाद (BCCI Selectors Unhappy With Secretary Over Rohit Sharma Comments)
भारत आणि इंग्लंड यांच्यातील वनडे मालिकेदरम्यान रोहित शर्मा लॉर्ड्सवरील सामना खेळल्यानंतर वनडे क्रिकेटमधूनही निवृत्ती घेऊ शकतो, अशा चर्चा रंगल्या होत्या. काही रिपोर्ट्सनुसार, निवड समितीने त्याला भविष्यातील आपल्या योजनांबाबत माहिती दिली होती. इंग्लंड मालिकेनंतर रोहितच्या जागी युवा खेळाडूला संधी देण्याचा विचारही सुरू असल्याचे सांगितले जात होते. याच पार्श्वभूमीवर लॉर्ड्स वनडेपूर्वी बीसीसीआय सचिव देवजीत सैकिया यांनी रोहितच्या भविष्याबाबत महत्त्वाचे वक्तव्य केले. रोहित भारतीय संघाच्या योजनांचा भाग असेपर्यंत तो देशाचे प्रतिनिधित्व करत राहील, अशी भूमिका सैकिया यांनी मांडली. यामुळेच आता निवड समिती आणि बीसीसीआयच्या भूमिकांमध्ये तफावत असल्याची चर्चा सुरू झाली आहे.
निवड समिती सैकियांच्या वक्तव्यावर नाराज?
‘द इंडियन एक्स्प्रेस’च्या रिपोर्टनुसार, निवड समितीतील काही सदस्य देवजीत सैकिया यांच्या वक्तव्यामुळे खूश नसल्याचे समोर आले आहे. कारण, सैकिया यांनी हे वक्तव्य करण्यापूर्वी निवड समितीने रोहितला त्याच्या भविष्यातील स्थानाबाबत माहिती दिल्याचे रिपोर्टमध्ये म्हटले आहे. निवड समितीची भूमिका अशी होती की, 2027 वनडे वर्ल्ड कपच्या पार्श्वभूमीवर रोहितच्या कामगिरीचे मालिकेनुसार मूल्यांकन करण्यात यावे. त्यानंतर त्याला संघात कायम ठेवायचे की युवा खेळाडूला संधी द्यायची, याचा निर्णय घेतला जावा. मात्र, बीसीसीआय सचिवांच्या वक्तव्यामुळे रोहितला भविष्यातही संघात स्थान मिळण्याची शक्यता असल्याचा संदेश गेला. त्यामुळेच बोर्ड आणि निवड समितीमध्ये या मुद्द्यावरून मतभेद निर्माण झाल्याचे बोलले जात आहे.
रोहितच्या जागी यशस्वीला संधी देण्याचा विचार?
निवड समिती भविष्यातील संघरचनेवरही विचार करत असल्याचे रिपोर्टमध्ये म्हटले आहे. रोहित शर्माच्या जागी युवा फलंदाज यशस्वी जैस्वालसारख्या खेळाडूला अधिकाधिक संधी देण्याचा विचार निवड समितीचा असल्याचे सांगितले जाते. यामागे 2027 च्या वर्ल्ड कपचा मोठा विचार आहे. वर्ल्ड कपपर्यंत भारतीय संघाला नव्या पिढीतील खेळाडूंना पुरेशा संधी देऊन मजबूत पर्याय तयार करायचे आहेत. त्यामुळे रोहितसारख्या अनुभवी खेळाडूच्या बाबतीत निर्णय घेताना त्याची सध्याची कामगिरी आणि भविष्यातील संघाची गरज या दोन्ही गोष्टींचा विचार केला जात आहे.
लॉर्ड्समधील शतकाने समीकरण बदललं?
या संपूर्ण प्रकरणात लॉर्ड्सवरील रोहित शर्माच्या शतकाचीही मोठी भूमिका असल्याचे मानले जात आहे. रोहितने लॉर्ड्सच्या ऐतिहासिक मैदानावर शानदार शतक झळकावत टीकाकारांना चोख प्रत्युत्तर दिले. याशिवाय रोहितने बीसीसीआयमधील एका वरिष्ठ अधिकाऱ्याची भेट घेतल्याची माहितीही रिपोर्टमध्ये देण्यात आली आहे. या घडामोडी आणि लॉर्ड्सवरील शतकानंतर रोहितला आगामी वेस्ट इंडिज मालिकेसाठी भारतीय संघात स्थान मिळण्याची शक्यता वाढल्याचे म्हटले जात आहे. जर रोहितचा वेस्ट इंडिज मालिकेसाठी संघात समावेश झाला, तर 2027 वर्ल्ड कपच्या त्याच्या स्वप्नाला पुन्हा बळ मिळू शकते.
आगरकरांच्या कार्यकाळावरही लक्ष
दरम्यान, रोहितच्या भविष्याबरोबरच भारतीय निवड समितीचे प्रमुख अजित आगरकर यांच्या कार्यकाळाचाही मुद्दा महत्त्वाचा ठरणार आहे. आगरकर यांचा सध्याचा कार्यकाळ सप्टेंबरमध्ये संपत आहे. या पार्श्वभूमीवर बीसीसीआय लवकरच अगरकर यांच्यासोबत बैठक करू शकते. निवड समितीच्या निर्णयांवरून आगरकर यांच्यावर यापूर्वी टीकाही झाली आहे. त्यामुळे त्यांच्या कार्यकाळाच्या विस्ताराबाबत होणारी चर्चा महत्त्वाची ठरणार आहे. नियमांनुसार अगरकर यांना आणखी एका वर्षाचा विस्तार मिळण्याची शक्यता आहे. मात्र, असा विस्तार मिळाल्यासदेखील 2027 वनडे वर्ल्ड कपपर्यंत ते मुख्य निवडकर्ता राहतीलच, असे निश्चित नाही.
हे ही वाचा -