मॅच फिक्सिंग आरोपावर मोहम्मद भाईचं मोठं वक्तव्य
एबीपी माझा वेब टीम | 21 Mar 2018 10:25 AM (IST)
शमी आणि त्याच्या पत्नीला मी इंग्लंडमध्ये भेटलो होतो, अशी कबुली मोहम्मद भाईने दिली.
नवी दिल्ली: टीम इंडियाचा क्रिकेटपटू मोहम्मद शमी आणि त्याची पत्नी हसीन जहां यांच्यात सुरु असलेल्या वादात मोठा खुलासा झाला आहे. लंडनमध्ये राहात असलेल्या मोहम्मद भाईने शमीवरील मॅच फिक्सिंगचे आरोप फेटाळले आहेत. शमी पूर्णत: निर्दोष आहे. मॅच फिक्सिंगशी माझा किंवा शमीचा काहीही संबंध नाही, असं मोहम्मद भाईने एका मुलाखतीत सांगितलं. मात्र शमी आणि त्याच्या पत्नीला मी इंग्लंडमध्ये भेटलो होतो, अशी कबुली मोहम्मद भाईने दिली. मी क्रिकेटचा चाहता आहे. जग जसं शमीला ओळखतं, तसंच मी सुद्धा त्याला ओळखतो. इंग्लंडमधील कोणत्यातरी एका सामन्यादरम्यान शमीची आणि माझी ओळख झाली होती, असं मोहम्मद भाई म्हणाला. इतकंच नाही तर शमी एक चांगला माणूस आहे. शमी आणि त्याची बायको इंग्लंडमध्ये आले होते तेव्हा मी वेळात वेळ काढून त्यांना लंडन फिरून दाखवलं होतं, त्यांच्यासोबत जेवण केलं. त्यानंतर त्यांना विमानतळावर सोडायलाही गेलो होतो, अशी सगळी माहिती मोहम्मद भाईने दिली. माझ्यावरील मॅच फिक्सिंगचे आरोप चुकीचे आहेत. मी कोणतंही चुकीचं काम केलं नाही. मी गेल्या 25 वर्षांपासून इंग्लंडमध्ये राहात असलो, तरीही माझ्या शरिरात भारताचंच रक्त आहे. कोणत्याही परिस्थितीत मी देशाशी गद्दारी करणार नाही. मी तिरंगा कधीही झुकू देणार नाही, असं मोहम्मद भाई म्हणाला. अलिश्बाला ओळखत नाही मोहम्मद शमीची पाकिस्तानी मैत्रिण आलिश्बाबत मोहम्मद भाईला विचारलं असता, मी अशा नावाच्या कोणत्याही मुलीला ओळखत नसल्याचं त्यांनी सांगितलं. तसंच मी हे नाव पहिल्यांदाच मीडियातून ऐकल्याचं ते म्हणाले. VIDEO: