'द ब्रेल मॅन ऑफ इंडिया' स्वागत थोरात यांच्या चमूद्वारे नागपुरात दृष्टिहीनांसाठी प्रशिक्षण

कार्यशाळेत सहभागी दृष्टिहीनांना इतर ज्ञानेंद्रियांचा वापर करून तृणधान्ये, धान्ये आणि भाजीपाला ओळखणे, वर्दळ असताना रस्ता ओलांडणे आदींचे प्रशिक्षण देण्यात आले.

विविध आवाज ओळखणे हा देखील कार्यशाळेचा एक भाग होता. लाभार्थ्यांच्या सक्रिय सहभागाचे त्यांच्या काळजी घेणाऱ्या स्वयंसेवकांचेही यावेळी आयोजकांनी आभार मानले.

सीताबर्डी येथील माहेश्वरी पंचायत भवनच्या सहकार्याने आयोजित कार्यशाळेत सहभागींना परिसरातील रस्त्यांवर छडीच्या सहाय्याने सतर्कतेने चालण्याचे प्रशिक्षण देण्यात आले.

पांढऱ्या छडीचा शास्त्रीय पद्धतीने वापर कसा करायचा, 2-पॉइंट तंत्र कसे वापरायचे आणि पायऱ्या चढताना छडी पकडण्यासाठी पेन्सिल ग्रिप असे विविध तंत्रे शिकवण्यात आली.

कार्यशाळेसाठी रोटरी इशान्यचे शहरातील शेकडो स्वयंसवेकांनी आपला पूर्णवेळ देऊन प्रशिक्षणार्थ्यांना मदत केली.

या दोन दिवसीय कार्यशाळेत सहभागी विविध संस्थांच्या विद्यार्थ्यांच्या पोषण आहाराचीही व्यवस्था करण्यात आली होती.

कार्यशाळेची सुरुवात समूह राष्ट्रगीत गायनाने झाली. राष्ट्रगीताच्या सामूहिक गायनाने परिसरातील उर्जा संचारली होती.

स्वयंसेवक आणि कार्यशाळेतील सहभागी दृष्टीहीनांसाठी विविध सांस्कृतिक कार्यक्रमांचेही आयोजन करण्यात आले होते.

दृष्टिहीनांना समाजातील मुख्य प्रवाहात आणण्याच्या उद्देशाने 'द ब्रेल मॅन ऑफ इंडिया' म्हणून प्रख्यात स्वागत थोरात यांच्या चमूने सहभागींना प्रशिक्षण दिले.