Myanmar Earthquake Death : म्यानमारमध्ये झालेल्या महाकाय भूकंपामध्ये आतापर्यंत मृतांचा आकडा 1644 वर पोहोचला असून तीन हजाराहून अधिक लोक जखमी असल्याची माहिती आहे. म्यानमार सरकारच्या माहितीनुसार 139 लोक अद्याप बेपत्ता आहेत. असं असलं तरी म्यानमारच्या मृतांची संख्या ही 10 हजाराहून अधिक असण्याची शक्यता काही संस्थांनी वर्तवली आहे. म्यानमारमध्ये भूकंपग्रस्तांना मदत करण्यासाठी भारताने ऑपरेशन ब्रह्मा सुरू केलं असून अत्यावश्यक वस्तू घेऊन भारतीय बचाव पथक म्यानमारमध्ये पोहोचलं आहे.
बीबीसीच्या वृत्तानुसार, म्यानमारच्या लष्करी नेतृत्वानुसार, देशातील मृतांची संख्या 1,644 झाली आहे, तर जखमींची संख्या 3,408 वर पोहोचली आहे.
10 हजार लोकांच्या मृत्यूची भीती
रॉयटर्सच्या रिपोर्टनुसार, युनायटेड स्टेट्स जिऑलॉजिकल सर्व्हे (यूएसजीएस) ने म्यानमारमध्ये मृतांची संख्या 10,000 पेक्षा जास्त होण्याची भीती व्यक्त केली आहे. त्याचवेळी थायलंडची राजधानी बँकॉकमध्ये 30 मजली इमारत कोसळल्याने 10 जणांचा मृत्यू झाला आहे. म्यानमारमधील भूकंपामुळे सर्वाधिक प्रभावित झालेले क्षेत्र मंडाले, बागो, मॅग्वे, उत्तर-पूर्व शान राज्य, सागाइंग आणि नायपीडाव आहेत. यंगून-मंडाले महामार्गाचे गंभीर नुकसान झाले असून, मदतकार्य कठीण झाले आहे.
India Operation Brahma : भारताचे ऑपरेशन ब्रह्मा सुरू
म्यानमारमधील लोकांची मानवतावादी मदत करण्यासाठी भारताने ऑपरेशन ब्रह्मा सुरू केलं आहे. ऑपरेशन ब्रह्मा अंतर्गत, तंबू, ब्लँकेट, स्लीपिंग बॅग, फूड पॅकेट, स्वच्छता किट, जनरेटर आणि आवश्यक औषधांसह 15 टन मदत सामग्रीची पहिली खेप यंगूनला पाठवली आहे.
भारतीय नौदलाची जहाजे INS सातपुडा आणि INS सावित्री 40 टन मानवतावादी मदत घेऊन यंगून बंदराच्या दिशेने निघाली. न्यूझीलंडने म्यानमारला दोन दशलक्ष न्यूझीलंड डॉलर्सची मदत जाहीर केली आहे. चीन आणि रशियानेही आपापले बचाव पथक म्यानमारला पाठवले आहे.
ही बातमी वाचा: