China Corona : शांघायमध्ये कोरोनाची परिस्थिती अनियंत्रित, लष्कर तैनात, 2019 नंतरची सर्वात वाईट स्थिती

मीडिया रिपोर्ट्सनुसार, चीनमध्ये 2019 च्या अखेरीस कोरोनाच्या पहिल्या टप्प्यात सापडलेल्या रुग्णांनंतर शांघायमध्ये कोविड पॉझिटिव्हची संख्या सर्वाधिक आहे.

China Corona : कोरोना व्हायरसने (Coronavirus) चीनची (China) स्थिती पुन्हा एकदा बिघडली आहे. येथे कोरोना बाधितांची संख्या सातत्याने वाढत आहे. चीनमधील अनेक प्रांतांमध्ये कोविड-19 चे रुग्ण मोठ्या प्रमाणात आढळून येत आहेत. सोमवार ते मंगळवार दरम्यान शांघायमध्ये सुमारे 9006 नवीन कोरोना रुग्ण आढळले. कोरोनाच्या पहिल्या लाटेनंतर एका दिवसातील हा सर्वात मोठा आकडा आहे. इथली परिस्थिती अनियंत्रित होत आहे, त्याला तोंड देण्यासाठी चीन सरकारने शांघायला सैन्य पाठवण्याचा निर्णय घेतला आहे. याशिवाय 2000 हून अधिक आरोग्य कर्मचारीही स्वतंत्रपणे येथे पाठवण्यात आले आहेत. हे सर्व लोक मिळून शहरातील सुमारे 2.6 कोटी लोकांची चाचणी घेतील.

2019 नंतरची सर्वात वाईट स्थिती

शांघायची लोकसंख्या सुमारे 26 दशलक्ष आहे. गेल्या काही दिवसांत या शहरात सर्वाधिक कोरोनाचे रुग्ण आढळले आहेत. परिस्थिती नियंत्रणात आणण्यासाठी सरकारने येथे 2 टप्प्यात लॉकडाऊन देखील लागू केले आहे, परंतु तरीही रुग्णांची संख्या वाढत आहे. मीडिया रिपोर्ट्सनुसार, चीनमध्ये 2019 च्या अखेरीस कोरोनाच्या पहिल्या टप्प्यात सापडलेल्या रुग्णांनंतर शांघायमध्ये दररोज प्राप्त होणाऱ्या कोविड पॉझिटिव्हची संख्या सर्वाधिक आहे.

शांघायमधील रुग्णालय रुग्णांनी भरले

शांघायमधील परिस्थितीचा अंदाज यावरून लावता येतो की येथील सर्व रुग्णालये तुडुंब भरलेली आहेत. कोणत्याही रुग्णालयात बाधित रुग्णांना दाखल करण्यासाठी जागा नाही. शांघायमधील या लाटेत चीनचा दावा असला तरी, आतापर्यंत कोरोना संसर्गामुळे एकही मृत्यू झालेला नाही.

संबंधित बातम्या