SSC Result 2023: ठाणे शहरातील विविध सिग्‍नलवर असलेल्‍या पुर्वाश्रमीच्‍या भीक्षेकरी मुलांना शिक्षणाच्‍या मुळ प्रवाहात आणण्‍यासाठी सुरू करण्‍यात आलेल्‍या सिग्नल शाळेचा विद्यार्थी किरण काळे दहावीची परिक्षा 60 टक्क्‍यांनी उत्‍तीर्ण झाला. वडील नसलेला किरण काळे आठ वर्षांचा असताना सिग्नल शाळेत दाखल होता.
ठाणे महानगरपालिका आणि समर्थ भारत व्यासपीठ संस्थेच्या माध्‍यमातून चालवल्‍या जात असलेल्‍या सिग्नल शाळेतील किरण काळे हा विद्यार्थी 60 टक्के गुण मिळवत दहावी उत्‍तीर्ण झाला. ठाण्याच्या तीन हात नाक्‍याखाली वडील नसलेला किरण आपल्या आईसोबत निर्वासित आयुष्य जगत होता. सिग्नल शाळेमुळे वयाच्‍या आठव्‍या वर्षी त्याला शाळेचे विश्‍व गवसले. सिग्नल शाळेत थेट तिसरीत दाखल झालेल्‍या किरणने आपल्‍यातील शैक्षणिक अनुशेष भरून काढत अभ्‍यासात चांगली प्रगती केली. त्‍याची ही प्रगती पाहून संस्थेने त्याला सरस्वती सेकंडरी शाळेत प्रवेश दिला. तेथे देखील त्याने चांगले यश संपादन केले आणि आता दहावीच्‍या निकालात 60 टक्‍यांनी उत्‍तीर्ण होत तो रस्त्यावरील मुलांसाठी आशेचा किरण ठरला.
किरणची आई मीना काळे ही निरक्षर असून गोखले रोडवर गजरे विकण्‍याचा व्‍यवसाय करते. पुढील शिक्षण घेऊन पोलीस ऑफिसर बनण्याचे किरणचे स्वप्न आहे. त्याला चांगले शिकून आईसाठी एक घर घ्‍यायचे आहे.
आपल्या यशाबाबत बोलताना किरण म्हणाला की, ही माझ्यासाठी जगण्याची लढाई होती. दररोज हार विकण्याशिवाय आमचं रोजचं जीवन चालूच शकत नव्हतं. त्यामुळे हार विकण्याचं काम एकदिवसही टाळता येण्यासारखं नव्हतं. त्यामुळे मी माझ्या आईला तिच्या कामात हातभार लावत होतो. फुलं विकत आणणं आणि नंतर हार आणि गजरे तयार करून ती विकणं, असं काम मी करत असतो असं किरणने सांगितलं. तर, रस्त्यावरील दिव्याखाली अभ्यास केल्याचंही तो म्हणाला.
सिग्नल शाळा ठाणे महानगरपालिका आणि एनजीओ समर्थ भारत व्यासपीठ यांच्या संयुक्त विद्यमाने चालवली जाते. किरणने आठ वर्षांचा असताना शाळेत जाण्यास सुरुवात केली, असे एनजीओशी संबंधित सामाजिक कार्यकर्ते बटू सावंत यांनी सांगितले. त्याने शहरातील सरस्वती माध्यमिक विद्यालयातून दहावीची परीक्षा दिली. गेल्या आठ वर्षांत सिग्नलशाळेत शिकणाऱ्या आठ रस्त्यावरील मुलांनी दहावीची परीक्षा दिली आहे, असे बटू सावंत यांनी सांगितले.
समर्थ भारत व्यासपीठ या सामाजिक संस्थेच्या कार्यकर्त्यांची नजर एक दिवशी हार विकणाऱ्या किरणवर पडली, त्यांनी त्याला सिग्नल शाळेत आणले. किरणसारख्या मुलांना शिक्षण घेता यावे, यासाठी या संस्थेने ठाणे महानगरपालिकेच्या मदतीने सिग्नल शाळा सुरू केली आहे.
हेही वाचा:
Knowledge : Math, Maths आणि Mathematics काय आहे फरक? वाचा सविस्तर
Education Loan Information:
Calculate Education Loan EMI