ठाणे: ठाण्यातील एक शहाणा म्हणत होता की राम काय खात होते, त्यावर मी एवढंच सांगतो की राम काहीही खाऊ द्या, पण तुम्ही मात्र शेण खालं आहे अशा शब्दात राज्याचे उपमुख्यमंत्री देवेंद्र फडणवीसांनी (Devendra Fadanvis) राष्ट्रवादीचे आमदार जितेंद्र आव्हाड (Jitendra Awhad) यांच्यावर टीका केली. तसेच ज्या लोकांना राम मंदिराला विरोध केला त्या लोकांच्या मांडीला मांडी लावून तुम्ही बसला असं म्हणत त्यांनी उद्धव ठाकरे यांच्यावरही टीका केली. देवेंद्र फडणवीस हे ठाण्यातील एका कार्यक्रमात बोलत होते.
श्री राम हा बहुजनांचा होता, तो मांसाहारी होता असं वक्तव्य या आधी आमदार जितेंद्र आव्हाडांनी केलं होतं. त्यानंतर त्यांनी यावर खेदही व्यक्त केला होता. त्यानंतर आता देवेंद्र फडणवीसांनी आव्हाडांना टोला लगावला.
राम मंदिर होणं ही अभिमानाची गोष्ट
अयोध्येत राम मंदिर होत आहे ही आपल्यासाठी अभिमानाची गोष्ट असल्याचं देवेंद्र फडणवीसांनी म्हटलं. ते म्हणाले की, 22 तारखेला असा उत्सव साजरा करा की दुनियेला समजलं पाहिजे अयोध्येचा राजा अयोध्येमध्ये पुन्हा विराजमान झाला आहे. छत्रपती शिवाजी महाराज यांनी स्वराज्य स्थापना केली. त्यामुळे पुन्हा एकदा स्वाभिमान निर्माण झाला. राम मंदीर होत आहे ही आमच्यासाठी खूप अभिमानाची गोष्ट आहे. बाबराने आपले राम मंदिर पाडले आणि बाबरी मशिद बांधली. सगळ्या लोकांना ही मशिद टोचत होती. 6 डिसेंबर रोजी ही बाबरी मशिद पाडली. मला आता आनंद होत आहे, पंतप्रधान मोदी यांच्या हस्ते भव्य राम मंदिर 22 जानेवारी स्थापना होणार आहे. काही लोकांनी राम मंदिराच्या प्राणप्रतिष्ठा कार्यक्रमावर बहिष्कार टाकला. त्यांनी सुप्रीम कोर्टात रामाच्या अस्तित्वाबद्दल प्रश्नचिन्ह उपस्थित केला.
आमच्या महाराष्ट्रात काही लोक आम्हाला विचारत होते की मंदिर कधी बांधणार? आता आम्ही राम मंदिर बांधलं, पण आता ते अयोध्येला कसे येणार, कारण त्यांना लाज वाटते असं म्हणत फडणवीसांनी उद्धव ठाकरे यांच्यावर टीका केली.
कारसेवक हीच माझी पहिली ओळख
मी सुद्धा कारसेवक होतो, कारसेवक हीच माझी पहिली ओळख आहे असं सांगत देवेंद्र फडणवीस म्हणाले की, काल त्यांनी विचारलं फडणवीस कारसेवक होते का? हो मी वीस वर्षाचा होतो, त्यावेळी कारसेवक होतो. तुमचे तर वय होते, त्यावेळी तुम्ही वाघाचे फोटो काढत होता. खरे कारसेवक तर अयोध्येत लाठ्या खात होते, गोळ्या खात होते. उद्धव ठाकरे तुमचा एक नेता दाखवा, जो अयोध्येत कारसेवक होता. ज्या लोकांनी राम मंदिराला विरोध केला त्यांच्या मांडीला मंडी लावून बसला.
ही बातमी वाचा: