Amazon : भारतीय स्पर्धा आयोगाने (CCI) ई-कॉमर्स कंपनी अ‍ॅमेझॉनला (Amazon) मोठा दणका दिला आहे. नियमांचे उल्लंघन आणि खोटी विधाने केल्याचा ठपका ठेवत अ‍ॅमेझॉनला 202 कोटी रुपयांचा दंड ठोठावण्यात आला आहे. CCIने अ‍ॅमेझॉन फ्यूचर कूपन्ससोबतच्या (Amazon Future Coupons) करारासाठी संमती रद्द केली आहे. त्याशिवाय दंडही ठोठावला आहे. नोव्हेंबर 2019 मध्ये, भारतीय स्पर्धा आयोगाने अ‍ॅमेझॉनला फ्युचर कूपनमधील 49 टक्के भाग खरेदी करण्याची परवानगी दिली होती. मात्र आता सीसीआयने आपला निर्णय मागे घेत परवानगी तूर्तास स्थगित राहणार असल्याचे सांगितले आहे.


सीसीआयने आपल्या आदेशात म्हटले आहे की, आता या कराराचे पुनर्मूल्यांकन करणे आवश्यक आहे. सीसीआयने 57 पानांचा आदेश जारी करून अ‍ॅमेझॉनने चुकीची आणि खोटी विधाने केल्याचे म्हटले आहे. यापूर्वी 16 नोव्हेंबर रोजी दिल्ली उच्च न्यायालयाने CCI ला अ‍ॅमेझॉन फ्यूचर कूपन्स डील प्रकरणात दिलेली मान्यता रद्द करण्यास सांगितले होते.


CCI च्या निर्णयावर CAIT नेही याचिका दाखल केली होती
यासाठी CCI ला दोन आठवड्यांचा कालावधी देण्यात आला होता. याआधी, CAIT ने CCI विरुद्ध जनहित याचिका देखील दाखल केली होती, त्यात असे म्हटले होते की, त्यांनी अ‍ॅमेझॉन कंपनीला जून महिन्यामध्येच कारणे दाखवा नोटीस जारी केली होती, परंतु अद्याप त्यावर कोणताही उत्तर देण्यात आलेले नाही.


काय आहे प्रकरण?
फ्युचर रिटेल लिमिटेडच्या (Future Retail Limited) स्वतंत्र संचालकांनी नुकतीच CCI कडे याचिका दाखल केली होती. त्यात म्हटले आहे की, CCI ने 2019 मध्ये फ्युचर कूपनमधील गुंतवणुकीसाठी अ‍ॅमेझॉनला दिलेली मान्यता रद्द करावी. CCIकडून परवानगी घेताना अ‍ॅमेझॉन कंपनीने चुकीची माहिती दिल्याचा आरोप त्यांनी केला होता. फ्युचर ग्रुपने रिलायन्स इंडस्ट्रीजला आपला रिटेल, वेअरहाऊसिंग आणि लॉजिस्टिक व्यवसाय सुमारे 24 हजार कोटी रुपयांना विकण्याचा करार केला होता. त्यावेळी म्हणजेच गेल्या वर्षी ऑगस्टमध्ये अ‍ॅमेझॉन कंपनीने फ्यूचर रिटेलची प्रमोटर कंपनी फ्यूचर कूपन प्रायव्हेटमध्ये 49 टक्के भागभांडवल विकत घेतल्याचे सांगून करारामध्ये आक्षेप घेतला होता. अशा परिस्थितीत रिलायन्ससोबत (Reliance) करार करण्यापूर्वी फ्युचर ग्रुपने अ‍ॅमेझॉनची परवानगी घ्यायला हवी होती. अ‍ॅमेझॉन कंपनीला प्रथम नकार देण्याचा अधिकार आहे.


महत्त्वाच्या बातम्या :



LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोड पाहा लाईव्ह - ABP Majha