मोठी बातमी! गौतमी पाटीलच्या सोलापुरातील कार्यक्रमाला पोलिसांनी परवानगी नाकारली

Gautami Patil : सोलापुरातील एका स्थानिक डिजिटल वृत्तवाहिनीच्यावतीने "डिस्को दांडिया" आयोजित करण्यात आले होते. या कार्यक्रमाला प्रमुख पाहुणे म्हणून गौतमी पाटील येणार होती.  

Gautami Patil Dance : सोलापुरात नृत्यांगना गौतमी पाटीलच्या (Gautami Patil)कार्यक्रमासाठी पोलिसांनी परवानगी (Police Permission) नाकारली आहे. कायदा आणि सुव्यवस्थेचे कारण सांगत सोलापुरातील विजापूर नाका पोलिसांनी ही परवानगी नाकारली आहे. सोलापुरातील एका स्थानिक डिजिटल वृत्तवाहिनीच्यावतीने "डिस्को दांडिया" आयोजित करण्यात आले होते. या कार्यक्रमाला प्रमुख पाहुणे म्हणून गौतमी पाटील येणार होती.

मात्र, या काळात नवरात्रमुळे पोलिसांकडील मनुष्यबळ बंदोबस्तसाठी वापरले जात असल्याने, गौतमीच्या कार्यक्रमात पोलीस बंदोबस्त देणं शक्य नसल्याने पोलिसांकडून परवानगी देण्यात आली नसल्याचे बोलले जात आहे. त्यामुळे गौतमी पाटीलच्या कार्यक्रमाची परवानगी नाकारत असल्याचे पोलिसांनी आयोजकाना पत्र दिले आहे. विशेष म्हणजे, गणेशोत्सवच्या काळात देखील गौतमी पाटीलच्या कार्यक्रमास राज्यात काही ठिकाणी परवानगी नाकारण्यात आली होती. 

पोलिसांनी पाठवलेल्या नोटीसमध्ये काय म्हटले आहे? 

पोलिसांनी आयोजकांना पाठवलेल्या नोटीसमध्ये म्हटले आहे की, "आपल्या न्युज चॅनलच्या वतीने 19 ऑक्टोबर रोजी वृंदावन गार्डन, एन आय जामगुंडी फार्म हाऊस, आसरा चौक, रेल्वे ब्रिज शेजारी, जुळे सोलापुर याठिकाणी सायंकाळी 5 ते रात्री 10 या वेळेत डिस्को दांडीया आयोजित केले आहे. या कार्यक्रमास गौतमी पाटील यांची उपस्थिती असणार आहे व त्यांच्या हस्ते बक्षिस वितरण समारंभ होणार आहे. तर, सदर कार्यक्रमास परवानगी मिळण्यासाठी वरिष्ठ कार्यालयाकडे आपला अर्ज प्राप्त झाला  असुन पुढील योग्य त्या कार्यवाहीसाठी सदरचे पत्र स्थानिक पोलीस ठाण्यास प्राप्त झाला आहे.

मात्र, गौतमी पाटील यांच्या यापुर्वी विविध ठिकाणी झालेल्या कार्यक्रमांचा इतिहास पाहता प्रत्येक ठिकाणी कायदा व सुव्यवस्थेचा प्रश्न निर्माण झालेला असुन, गर्दी नियंत्रण करण्यासाठी लाठीचार्ज वगैरे केलेच्या घटना घडलेल्या आहेत. आपला नियोजित कार्यक्रम 19 ऑक्टोबर रोजी होणार असुन सदर कालावधीत नवरात्रौत्सव चालु असतो. तर, पोलीस ठाणेकडील उपलब्ध जास्तीत जास्त मनुष्यबळ विविध ठिकाणी बंदोबस्ताकरिता वापरले जाते. तसेच नवरात्रौत्सवा दरम्यान यापुर्वीचा इतिहास पाहिले असता सन 2002 मध्ये दोन समाजामध्ये जातीय घटना घडल्याचा इतिहास आहे. त्याबाबत विजापुर नाका पोलीस ठाणे येथे गुन्हे दाखल आहेत. त्यामुळे, कायदा व सुव्यवस्थेच्या कारणास्तव आपल्या 19 ऑक्टोबर रोजीच्या गौतमी पाटील यांच्या प्रमुख उपस्थितीतील डिस्को दांडीया या कार्यक्रमास विजापुर नाका पोलीस ठाणेकडुन परवानगी नाकारण्यात येत आहे.

इतर महत्वाच्या बातम्या: