Beed News बीड: मस्साजोग गावाचे सरपंच संतोष देशमुख हत्या (Santosh Deshmukh Murder Case) प्रकरणाची आज (24 जून) बीडच्या जिल्हा व विशेष सत्र न्यायालयात सुनावणी होणार आहे. मागील सुनावणी दरम्यान न्यायाधीश रजेवर असल्याने सुनावणी पुढे ढकलण्यात आली होती. दरम्यान आजच्या सुनावणीला विशेष सरकारी वकील उज्वल निकम यांची देखील उपस्थिती असणार आहे.
या प्रकरणात वाल्मीक कराडसह अन्य आरोपींवर मकोका अंतर्गत कारवाई करण्यात आली आहे. मात्र, या घटनेतील आरोपी कृष्णा आंधळे हा आरोपी अद्यापही फरार आहे. मागील सुनावणीत विशेष सरकारी वकील उज्ज्वल निकम यांनी या प्रकरणात आरोप निश्चितीसाठी पुरेसे पुरावे उपलब्ध असल्याने आरोप निश्चिती करण्यात यावी, असा अर्ज न्यायालयात सादर केला होता. दुसरीकडे वाल्मीक कराडच्या वकिलांनी अद्याप सरकारी पक्षाकडून डिजिटल पुरावे मिळाले नसल्याचे न्यायालयात नमूद केले. तसेच कराडच्या दोषमुक्तीचा अर्ज देखील न्यायालयात सादर करण्यात आला आहे. त्याबरोबरच कराडच्या संपत्ती जप्ती बाबत सरकारी पक्षाकडून युक्तिवाद होईल, अशी शक्यता आहे. त्यामुळे या प्रकरणी आज न्यायालय नेमका काय निकाल देतं हे पाहणे महत्वाचे ठरणार आहे.
आरोपीची प्रॉपर्टी जप्ती, निर्दोष मुक्तता अर्जावर सुनावणी होणार - धनंजय देशमुख
दरम्यान, आजच्या सुनावणीत आरोपीच्या प्रॉपर्टी जप्त करण्यासाठी अर्ज दिला आहे. त्यावर आज सुनावणी होणार आहे. आज त्याचा निकाल शंभर टक्के लागणार आहे.आरोपीने निर्दोष मुक्तीचाजो अर्ज दिला आहे त्याची देखील आज सुनावणी होईल. तसेच आजच्या तारखेला चार्ज देखील फ्रेम होईल. आजच्या सुनावणीसाठी विशेष सरकारी वकील अँड.उज्वल निकम उपस्थित राहणार असल्याचे मयत सरपंच संतोष देशमुख यांचे भाऊ धनंजय देशमुख यांनी सांगितले आहे. सरपंच संतोष देशमुख यांच्या हत्या प्रकरणाची सुनावणी आज बीड येथील विशेष मकोका न्यायालयात होणार आहे. 17 जून रोजी न्यायाधीश रजेवर असल्याने ही सुनावणी पुढे ढकण्यात आली होती.
संतोष देशमुख यांचा मुलगा सैनिकी शाळेत घेणार शिक्षण
बीडच्या मस्साजोग येथील सरपंच संतोष देशमुख यांची हत्या करण्यात आली होती. त्यानंतर त्यांचे कुटुंब मुख्यमंत्री देवेंद्र फडणवीस फडणवीस यांना भेटण्यासाठी गेले असता, त्यांनी विराज देशमुखच्या शिक्षणाची जबाबदारी घेतली होती. त्यानुसार आता विराज देशमुख हा सांगली जिल्ह्यातील रेठेधरण येथील सैनिकी शाळेमध्ये शिक्षण घेणार आहे.याबाबतचे पत्र वर्षा निवासस्थानी झालेल्या महेश सरपंच संतोष देशमुख यांचे भाऊ धनंजय देशमुख यांना सुपूर्द करण्यात आलेय. यावेळी औसा मतदारसंघाचे आमदार अभिमन्यू पवार तसेच आमदार सदाभाऊ खोत यांची देखील उपस्थिती होती.
हे ही वाचा