Ratnagiri News : महाराष्ट्र नवनिर्माण सेनेचे (MNS) राज्य सरचिटणीस वैभव खेडेकर (Vaibhav Khedekar) यांच्या पाठोपाठ आता मनसेच्या कार्यकर्त्यांच्या अडचणीत देखील वाढ झाली आहे. गणेशोत्सवातील (Ganeshotsav 2022) लॉटरी घोटाळा प्रकरणात मनसेच्या तीन पदाधिकारी आणि कार्यकर्त्यांना खेड पोलिसांनी (Khed Police) काल (20 ऑक्टोबर) अटक केली आहे. रस्ते आस्थापना जिल्हा संघटक मिलिंद उर्फ दादू नांदगावकर, विद्यार्थी सेनेचे तालुकाप्रमुख प्रसाद शेट्ये आणि केदार वणंजू या तिघांना पोलिसांनी अटक करुन न्यायालयासमोर हजर केले असता या तिघांनाही तीन दिवसांची पोलीस कोठडी सुनावण्यात आली आहे. 


तर दुसरीकडे मुंबई उच्च न्यायालयात आज (21 ऑक्टोबर) वैभव खेडेकर यांच्या अटकपूर्व जामीन अर्जावर सुनावणी होणार असल्याची माहिती प्राप्त होत आहे. दरम्यान गेल्या दोन दिवसांपासून वैभव खेडेकर हे नॉट रीचेबल आहेत. गणेशोत्सवातील लॉटरी घोटाळा प्रकरणात वैभव खेडेकर यांच्यावर अटकेची टांगती तलवार असून रत्नागिरीचे लाचलुचपत प्रतिबंधक विभागाचे पथक त्यांचा कसून शोध घेत आहेत. अटकपूर्व जामीन मंजूर न झाल्यास वैभव खेडेकर यांच्या अडचणीत वाढ होण्याची शक्यता आहे.


गणेशोत्सावातील लॉटरी घोटाळा प्रकरणात वैभव खेडेकर यांच्याविरुद्ध गुन्हा
मनसेचे राज्य सरचिटणीस आणि राजवैभव प्रतिष्ठानचे अध्यक्ष तसंच माजी नगराध्यक्ष वैभव खेडेकर यांच्यावर सप्टेंबर महिन्यात खेड पोलीस स्थानकात गुन्हा दाखल झाला होता. मनसेच्या वतीने गणेशोत्सव कालावधीमध्ये विनापरवानगी लकी ड्रॉ स्पर्धेचे आयोजन करुन लोकांकडून पैसा गोळा केल्याप्रकरणी या गुन्ह्याची नोंद झाली होती. अरबाज असगरअली बडे यांच्या तक्रारीवरुन खेड पोलीस ठाण्यात वैभव खेडेकर यांच्याविरुद्ध गुन्हा दाखल झाला होता. या लकी ड्रॉसाठी लोटे एमआयडीसीमधील कोणकोणत्या कंपन्यामधून किती रक्कम गोळा केली याबाबत चौकशी होण गरजेचे आहे, अशी मागणीही तक्रारदार अरबाज असगरअली बडे (खेड) यांनी केली आहे.


गैरव्यवहाराचा ठपका ठेवत माजी नगराध्यक्ष खेडेकर सहा वर्षांसाठी अपात्र
दरम्यान, खेड नगरपरिषदेचे माजी नगराध्यक्ष वैभव खेडेकर यांच्यावर यापूर्वीच गैरव्यवहाराचा आरोप ठेवत सहा वर्षांसाठी त्यांना अपात्र ठरवण्यात आलं होतं. विद्यमान मुख्यमंत्री आणि तत्कालीन नगरविकास मंत्री एकनाथ शिंदे यांनी हे आदेश दिले होते. आता पुन्हा गणेशोत्सव स्पर्धेतील लकी ड्रॉ प्रकरणी खेडेकर यांचा पाय खोलात गेला आहे.


इतर महत्त्वाची बातमी



भोंग्यावर आवाज उठवल्याने मनसेच्या वैभव खेडेकरांना परदेशातून धमकी, रत्नागिरीत गुन्हा नोंद