मोठी बातमी: पाण्याच्या लोंढ्यात एकजण वाहून गेला; किल्ले रायगडाचे दरवाजे पर्यटकांसाठी बंद

Raigad Fort Closed : रायगड किल्ला पर्यटकांसाठी बंद करण्यात आला आहे. भीषण पावसात पर्यटक अडकल्यानंतर आता प्रशासन अलर्ट मोडवर आलं आहे. आपबीती टाळण्यासाठी गडाच्या पायथ्याशी पोलीस बंदोबस्त देखील तैनात करण्यात आला आहे.

Raigad : रायगड परिसरात झालेल्या ढगफुटी सदृश्य पावसानंतर आजपासून (दि.8 जुलै) रायगड किल्ला पर्यटकांसाठी बंद करण्यात आला आहे. रायगड (Raigad Rain) जिल्ह्यात सुरू असलेल्या अतिवृष्टीमुळे प्रशासनाकडून तातडीने हा निर्णय जारी करण्यात आला आहे. 31 जुलैपर्यंत रायगड पर्यटकांसाठी (Raigad Closed For Tourists) बंद असणार आहे. रविवारी झालेल्या मुसळधार पावसात एक पर्यटक वाहून गेला, त्यानंतर आता रोप वेसह पायरी मार्ग देखील बंद करण्यात आले आहेत. 

रायगडाकडील सर्व मार्ग बॅरीकेटिंग टाकून बंद 

रायगड किल्ल्यावर पायी जाणारा चित्त दरवाजा आणि नाणे दरवाजा मार्ग बॅरीकेटिंग टाकून  बंद करण्यात आला आहे. रायगड किल्ले परिसरात पोलीस  बंदोबस्त नेमण्यात आला आहे, तसेच सद्यस्थितीत किल्ले रायगडावर असलेल्या पर्यटकांना रोपवे ने गडावरुन उतरवण्यात येत आहे. यानंतर रोप वे देखील प्रशासनाकडून बंद करण्यात येणार आहे.

रायगड परिसरात कोसळधार

आज रायगडात मुसळधार पाऊस कोसळला आहे. काही भागात ढगफुटी झाल्यामुळे अनेक नद्या तुडुंब भरून वाहताना दिसत आहेत. किल्ले रायगडावर देखील ढगफुटीसदृश पाऊस झाला. किल्ले रायगडावरील महादरवाजातून पाण्याचा लोंढा वाहत आहे. मुख्य दरवाजातून पाण्याचं रौद्र रुप पाहायला मिळतंय, यातच रायगडावर पर्यटनासाठी आलेले शिवभक्त थोडक्यात बचावले आहेत.  किल्ल्याच्या पायऱ्यांना धबधब्याचं स्वरुप आलं आहे, त्यामुळे यावरुन खाली उतरणं देखील कठीण झालं आहे.

पावसाचं रौद्ररुप, पर्यटक अडकले

आज अनेक पर्यटक रायगडावर गेले असतानाच मुख्य पायऱ्यांवरील काही भागात मोठ-मोठे धबधब्यांसारखे पाण्याचे लोंढे वाहू लागले, त्यामुळे येथील अडकलेले पर्यटक आपला जीव धोक्यात घालून या पायऱ्यांवरील वाट काढत मार्ग काढू लागले. आता कसेतरी हे पर्यटक पावसाच्या कचाट्यातून सुखरुप बाहेर पडले आहेत. मुसळधार पावसात गडकिल्ल्यांवर चढण्याचं धाडस करू नये, असं आवाहन सध्या करण्यात येत आहे.

राज्यासह कोकणात पावसाची जोरदार हजेरी

राज्यातील (Maharashtra Rain Updates) अनेक भागांत मुसळधार पाऊस (Rain Latest Updates) कोसळत आहे. पावसाच्या जोरदार सरींनी अनेक भागांत जनजीवन विस्कळीत झाल्याचं पाहायला मिळत आहे. मुंबई (Mumbai Rains), ठाणे, नवी मुंबई, कल्णाय परिसरांत पावसानं जोरदार हजेरी लावली आहे. सकाळी सकाळी पावसानं धुमाकूळ घातल्यामुळे कामावर निघालेल्या चाकरमान्यांचे हाल होत आहेत. यासोबतच कोकणातही जोरदार पाऊस पडत असून आज दिवसभरात मुसळधार पावसाचा इशाराही देण्यात आला आहे. कोकणातही पावसानं जोरदार हजेरी लावली आहे.

हेही वाचा :