Pune News : पुणेकर रस्त्यावर दिसणाऱ्या (Dove) पारव्यांना अनेकदा दाणे टाकताना दिसतात. पारव्यांना दाणे टाकणं आता पुणेकांना चांगलंच महागात पडणार आहे. पारव्यांना दाणे टाकताना कोणी आढळल्यास पुणे महापालिकेकडून पाचशे रुपये दंड करण्यात येणार आहे. अनेकजण आपल्याला पुण्य मिळेल या भावनेने पारव्यांना खायला घालतात. त्यामुळे या पारव्यांची संख्या मोठ्या प्रमाणात वाढली आहे. मात्र या पारव्यांमुळे न्यूमोनिया आणि श्वसनाचे इतर विकार बळावत असल्याने महापालिकेकडून या पारव्यांना खायला घालणाऱ्यांना दंड करण्यात येणार आहे. 


पुण्यातील अनेक परिसरांमध्ये मोठ्या प्रमाणात पारवे दिसून येतात. पुण्यातील वृद्धेश्वर-सिद्धेश्वर घाट, शनिवार पेठ, नारायण पेठ या ठिकाणी असलेल्या घाट आणि नदीकाठावर अनेक पुणेकर पुण्य मिळावं म्हणून रोज ज्वारीचे दाणे टाकले जातात. त्यामुळे शेकडो पारवे याठिकाणी जमा होतात. जमलेल्या शेकडो पारव्यांच्या थव्यामुळे या परिसरात अस्वच्छता आणि दुर्गंधी पसरते. त्यामुळे अनेकांना अस्वच्छतेचा सामना करावा लागतो. काही क्षुल्लक पक्षीप्रेमींमुळे अनेक पुणेकरांना या पारव्यांचा त्रास सहन करावा लागत आहे. त्यामुळे महापालिकेकडून आता दंड आकारण्यात येणार आहे. 


फुफ्फुसाच्या आजारांमध्ये वाढ


शहरात पारव्यांना दाणे टाकणाऱ्यांचं प्रमाण प्रचंड आहे. त्यामुळे अनेक परिसरात पारव्यांचे थवे दिसतात. या पारव्यांच्या थव्यांमुळे परिसरात मोठ्या प्रमाणात अस्वच्छता निर्माण होते. पक्षांच्या विष्ठेमुळे आणि पंखातून निघणाऱ्या पावडरमुळे माणसाला फुफ्फुसाचे अनेक आजार होण्याचा धोका निर्माण होतो. त्यामुळे शहरात न्युमोकेनियोसिस, पिस्टोप्लाझमोसिस सारखे आजार वाढत आहेत. त्यामुळे अनेकांना बराच काळ टिकणारा खोकला होत आहे आणि काही ठिकाणी श्वसनाचे आजार पसरत आहेत. 


दाणे दिल्याने पारव्यांची संख्या वाढते


शहरात अनेक ठिकाणी पारव्यांना दाणे टाकले जातात. त्यामुळे पारवे काही विशिष्ट ठिकाणी जमा होतात. मात्र याच दाण्यामुळे पारव्यांची प्रकृती सुधारते आणि परिणामी पारव्यांच्या प्रजननाला याचा फायदा होऊन त्यांची संख्या वाढते. त्यामुेळे शहरात अनेक ठिकाणी पारव्यांचे अड्डे तयार झाले आहेत. 


ठाण्यानंतर पुणे महापालिकेला जाग


यापूर्वी ठाणेकरांना कबुतरांना दाणे टाकल्यास दंड आकारण्याचा निर्णय घेण्यात आला होता. कबुतरांपासून सावधान असे बॅनर्सदेखील ठाण्यात लावण्यात आले होते. त्यानंतर ठाणे महापालिकेने कारावाईदेखील सुरु केली होती. ते पाहता आता पुणे महानगरपालिकेला जाग आली आहे. त्यांनी देखील आता दंड आकारण्याता निर्णय घेतला आहे. या सगळ्या कामाचा दर 15 दिवसांनी आढावा घेतला जाणार असल्याचं पालिकेने सांगितलं आहे.