Honey Bee : पुणे जिल्ह्यात एकाच (Honey Bee) कुटुंबातील 10 जणांवर मधमाशांनी हल्ला केल्याची घटना घडली आहे. सिंहगड किल्ल्याजवळ असलेल्या सांबरेवाडी येथील भवानी आई माता देवीच्या दर्शनासाठी जात असताना एकाच कुटुंबातील दहा जणांवर मधमाश्यांनी हल्ला केला. या हल्ल्यात सर्वजण गंभीर जखमी झाले आहेत.
मधमाशांच्या हल्ल्यात रेश्मा भदिर्गे, मालन थोपटे, सुरेखा थोपटे, संस्कार भदिर्गे, कादंबरी भदिर्गे, राहुल पवार, नारायण भदिर्गे, सयाजी भदिर्गे, नंदा भदिर्गे, सुरेश चोरघे हे कुटुंबातील सर्व सदस्य गंभीर जखमी झाले. त्यांना सिंहगड रोडवरील किरकटवाडी फाटा येथील खासगी रुग्णालयात दाखल करण्यात आले आहे.
मधमाशांचा हल्ला अचानक आणि इतका तीव्र होता की कुटुंबातील सर्व सदस्य बेशुद्ध पडले. काही ग्रामस्थ आणि इतर कुटुंबीयांकडून माहिती मिळाल्यानंतर जखमींना शोधून तातडीने उपचारासाठी खासगी वाहनाने रुग्णालयात नेण्यात आले. जखमी हे पुणे जिल्ह्यातील मावळ तालुक्यातील खामगाव येथील आहेत. पुणे जिल्हा परिषदेचे मुख्य कार्यकारी अधिकारी आयुष प्रसाद यांना या घटनेची तात्काळ माहिती देण्यात आली आणि त्यांनी जखमींना तातडीने मदत मिळावी यासाठी आरोग्य विभाग आणि पोलीस प्रशासनाशी संपर्क साधला. गरज भासल्यास रुग्णांना उपचारासाठी अन्य रुग्णालयात हलवण्याची व्यवस्था करण्यात आल्याचे आश्वासनही त्यांनी दिले.
आम्ही रुग्णालयाच्या अधिकाऱ्यांच्या संपर्कात आहोत आणि त्यांच्याकडे उपचार देण्यासाठी आवश्यक संसाधने आहेत. त्‍यापैकी कोणालाही इतर दवाखान्यात हलवण्याची आवश्‍यकता असल्‍यास आम्ही दोन रुग्णवाहिका तैनात केल्या आहेत. तालुका आरोग्य अधिकारी घटनास्थळी पोहोचले असून परिस्थितीवर लक्ष ठेवून आहेत. आम्ही त्यांच्या लवकर बरे होण्यासाठी प्रार्थना करतो आणि लोकांना मधमाशांपासून आवश्यक सावधगिरी बाळगण्याची विनंती करतो, असं ते म्हणाले.
भारताच्या ग्रामीण भागात मधमाशांचे हल्ल्यात वाढ झाली आहे. मधमाशांचे हल्ले टाळण्यासाठी लोकांनी सावधगिरीचे उपाय करावेत. हलक्या रंगाचे कपडे घालणे, मजबूत परफ्यूम टाळणे आणि मधमाशांच्या पोळ्यांना त्रास न देणे यासारख्या सावधगिरी बाळगण्याचा सल्ला दिला आहे. हल्ला झाल्यास, लोकांनी सुरक्षित ठिकाणी जावे आणि त्वरित वैद्यकीय मदत घ्यावी, असाही सल्लाही दिला आहे.
सयाजी शिंदेवर मधमाशी हल्ला...
अभिनेते सयाजी शिंदे यांच्यावर मधमाशाचा हल्ला झाला होता. सयाजी शिंदे यांनी पुणे-बंगळुरु महामार्गावरील झाडांचं पुनर्रोपण करत होते. यावेळी त्यांच्यावर मधमाशांनी हल्ला केला होता. पुणे-बंगळुरु महामार्गाचे रुंदीकरण सुरु असल्यामुळे तेथील झाडे वाचवण्यासाठी ते तासवडे येथे स्वतः उपस्थित होते. यावेळी मधमाशांनी त्यांच्यावर हल्ला केला होता. त्यानंतर सयाजी शिंदे यांना त्यांच्या गाडीमध्ये बसवण्यात आलं होतं. सयाजी शिंदे कायम जंगलांमध्ये किंवा दाटीवाटीच्या परिसरात झाडांचं संगोपन किंवा अभ्यास करण्यासाठी फिरत असतात. एवढ्या वर्षात त्यांच्यावर पहिल्यांदाच मधमाशांचा हल्ला झाला आहे. या सगळ्या घटनेबाबात बोलताना ते म्हणाले की, माझ्यावर मधमाशांचा हल्ला झाला मात्र मी सुखरुप आहे. मला कोणतीही दुखापत झाली नाही.