सोलापूर : राज्यात गेल्या काही दिवसांपासून शिवसेना (shivsena) ठाकरे गटाला धक्का देत शिवसेना शिंदे गटात अनेकांचे प्रवेश होत आहेत. शिवसेना नेते व मंत्री उदय सामंत यांनी मिशन टायगरचा उल्लेख करत लवकरच शिवसेनेत अनेक प्रवेश होतील, असे म्हटले होते. त्यानंतर, काही नेत्यांचे प्रवेशही झाले आहेत. आता, सोलापूर (Solapur) जिल्ह्यातील शिवसेना ठाकरे गटाचे जिल्हाप्रमुख आणि माजी मंत्र्यांची शिवसेना उबाठा पक्षातून हकालपट्टी करण्यात आली आहे. शिवसेना ठाकरे गटाच्या मध्यवर्ती कार्यालयातून याबाबतचे आदेश जारी करण्यात आले आहेत. ठाकरे गटाचे जिल्हाप्रमुख आणि विधानसभा उमेदवार अमर पाटील, सहसंपर्क प्रमुख आणि माजी मंत्री उत्तमप्रकाश खंदारे यांची पक्षातून हकालपट्टी करण्यात आली. विशेष म्हणजे अमर पाटील आणि उत्तमप्रकाश खंदारे हे शिवसेना शिंदे गटाच्या वाटेवर असून उद्याच शिंदे गटात प्रवेश करणार असल्याची सूत्रांची माहिती आहे.
विधानसभा निवडणुकीदरम्यान शिवसेनेकडून अमर पाटील यांना तिकीट दिल्यानंतर महाविकास आघाडीत काही काळ बिघाडी झाली होती. येथील जागेवर काँग्रेसने दावा केला होता, तसेच नवख्या अमर पाटील यांना शिवसेना ठाकरे गटाकडून तिकीट मिळाल्याने अनेकांच्या भुवया उंचावल्या होत्या. तर, विधानसभा निवडणुकीत अमर पाटील यांचा दारुण पराभव झाला. त्यानंतर, आता ते ठाकरेंची साथ सोडून शिंदेच्या शिवसेनेत प्रवेश करत आहेत.शिवसेनेचे हे पदाधिकारी उद्या मुंबईत शिवसेना शिंदे गटात पक्ष प्रवेश करण्यापूर्वीच ठाकरे गटाने त्यांची हकालपट्टी केली आहे. जिल्हाप्रमुख अमर पाटील यांनी दक्षिण सोलापूरची 2024 ची विधानसभा निवडणूक लढवली होती. मात्र, या निवडणुकीत त्यांचा पराभव झाला होता. तर उत्तम प्रकाश खंदारे हे राज्यमंत्री आणि दोन वेळा शिवसेनेचे माजी आमदार राहिले आहेत. आता, हे दोन्ही नेते शिंदेंच्या शिवसेनेत प्रवेश करत आहेत. मात्र, या पदाधिकाऱ्यांनी पक्षांतर करण्यापूर्वीच शिवसेना ठाकरे गटातून हकालपट्टी करण्यात आली. दरम्यान जिल्हाप्रमुख अमर पाटील यांनी पक्षातील गटाबाजीला कंटाळून आपल्या जिल्हाप्रमुख पदाचा राजीनामा संपर्कप्रमुख अनिल कोकीळ यांच्याकडे सुपूर्द केल्याचे आपल्या राजीनामा पत्रात म्हटले आहे.