Pahalgam Terror Attack : धार्मिक भावना दुखवल्याप्रकरणी करमाळा तालुक्यातील शेलगाव वांगी येथील तरुणाला न्यायालयाने तीन दिवसाची पोलीस कोठडी सुनावली आहे. त्याने पहलगाम हल्ल्यानंतर एक स्टेटस ठेवले होते. यानंतर बजरंग दलाचे कार्यकर्त्यांनी त्याच्या विरोधात करमाळा पोलीस ठाण्यात तक्रार दाखल केली होती. यावर रात्री त्याला अटक करण्यात येऊन आज न्यायालयात उभे केले असता त्याला तीन दिवसाची पोलीस कोठडी सुनावण्यात आली आहे.
करमाळा तालुक्यातील शेलगाव वांगी येथील युवकाने पहलगाम घटनेच्या समर्थनार्थ स्टेटस ठेवल्याने समाजाच्या भावना दुखावणे व चिथावणीखोर कृत्य केल्याच्या आरोपाखाली करमाळा पोलिसांत गुन्हा दाखल करण्यात आला होता. याबाबत बजरंग दलाच्या कार्यकर्त्यांनी तक्रार दाखल केली होती.
याबाबत तक्रारदार यांनी केलेल्या तक्रारीत म्हटले आहे की, मी राजुरी येथे घरी असताना माझा मित्र नागेश पंडीत वाळुंजकर (रा. शेलगाव वांगी ता. करमाळा) याने मला सांगितले की, मोबाईलवर शेलगाव वांगी येथे हिंदू समाजाच्या भावना भडकवणारे कोणीतरी आक्षेपार्ह स्टेटस ठेवले आहे. त्या स्टेटसच्या फोटोची पाहणी केली असता याने त्याच्या मोबाईलवर व्हॉटस्अप स्टेटसला आक्षेपार्ह मजकूर ठेवून सामाजिक भावना दुखावून जातीय तेढ निर्माण केला आहे.
सोशल मीडियाच्या व्हाट्सअप अकाऊंटवर त्याने काश्मीरमधील पहलगाम येथील दहशवादी हल्ल्याच्या समर्थनार्थ समाजात तेढ व तणाव निर्माण होईल असा मजकूर/स्टोरी स्टेटसला ठेवून दुसऱ्या कोणत्याही वर्गाविरुद्ध किंवा समूहाविरुद्ध चिथावणी दिली. तसेच जनतेमध्ये भीती निर्माण करून सार्वजनिक शांतता भंग केला म्हणून या विरुद्ध विहिंप, बजरंग दलाचे लक्ष्मण बबन साखरे यांनी करमाळा पोलिस स्टेशनला दिलेल्या फिर्याद दिली. त्यानुसार भारतीय न्याय संहिता 2023 चे कलम 299 अंतर्गत गुन्हा दाखल करण्यात आला आहे.
इतर महत्त्वाच्या बातम्या