नाशिक : महाराष्ट्र विधानसभा निवडणूक 2024 चे (Maharashtra Assembly Elections 2024) बिगुल वाजले आहे. राज्यात एकाच टप्प्यात निवडणूक होणार असून 20 नोव्हेंबरला मतदानाची प्रक्रिया पार पडणार आहे. तर 23 नोव्हेंबरला निकाल लागणार आहे. या पार्श्वभूमीवर राजकीय घडामोडींना वेग आल्याचे दिसून येत आहे. आज भारतीय जनता पक्षाकडून 99 उमेदवारांची पहिली यादी (BJP Candidate List) जाहीर केली आहे. या यादीत नाशिक जिल्ह्यातील चार विद्यमान आमदारांना भाजपने पुन्हा एकदा संधी दिली आहे. मात्र नाशिक मध्य विधानसभा मतदारसंघाच्या विद्यमान आमदार देवयानी फरांदे (Devyani Pharande) यांच्या नावाचा समावेश पहिल्या यादीत करण्यात आले नाही.
नाशिक जिल्ह्यात चार विद्यमान आमदारांना पुन्हा भाजपकडून उमेदवारी देण्यात आली आहे. नाशिक पश्चिममधून सीमा हिरे (Seema Hiray), नाशिक पूर्वमधून राहुल ढिकले (Rahul Dhikle), चांदवडमधून डॉ. राहुल आहेर (Dr Rahul Aher), तर बागलाणमधून दिलीप बोरसे (Dilip Borse) यांना भाजपकडून उमेदवारीची घोषणा करण्यात आली आहे.
देवयानी फरांदे वेटिंगवर
तर नाशिक मध्यच्या आमदार देवयानी फरांदे मात्र वेटिंगवर आहेत. देवयानी फरांदे यांना पहिल्या यादीत स्थान देण्यात आलेले नाही. यामुळे देवयानी फरांदे यांच्या कार्यकर्त्यांमध्ये संभ्रमावस्था पाहायला मिळत आहे. तर भाजपची दुसरी यादी काही तासातच जाहीर होण्याची शक्यता वर्तवली जात आहे. भाजपच्या दुसऱ्या यादीत देवयानी फरांदे यांना स्थान मिळणार का? याकडे आता सर्वांचे लक्ष लागले आहे.
हिरे, आहेर यांना पुन्हा संधी
नाशिक पश्चिममधून सीमा हिरे यांना तर चांदवडमधून राहुल आहेर यांच्या उमेदवारीला विरोध झाला होता. राहुल आहेर यांचे बंधू केदा आहेर हे चांदवड-देवळा विधानसभेतून निवडणूक लढवण्यासाठी इच्छुक होते. केदा आहेर यांच्यासाठी राहुल आहेर यांनी पत्रकार परिषद घेत उमेदवारी मागे घेत असल्याची घोषणा केली होती. राहुल आहेर यांनाच भाजपकडून उमेदवारी मिळाल्याने केदा आहेर हे काय भूमिका घेणार? याकडे सर्वांचे लक्ष लागले आहे. तर नाशिक पश्चिममधून देखील सीमा हिरे यांच्या उमेदवारीला स्थानिक भाजप नेत्यांनी विरोध केला होता. त्यामुळे हे नेते नेमकी काय भूमिका घेणार? हे पाहणे महत्त्वाचे ठरणार आहे.
इतर महत्त्वाच्या बातम्या