आज सकाळी वाघाने केलेल्या शिकारीचे काही व्हिडीओ वायरल झाले होते. त्यामध्ये लंगडी या वाघिणीचे दोन वर्ष वयाचे दोन बछडे एका हरणाची शिकार करत असल्याचे दिसत होते. मात्र, डॉ दिपानी यांनी चित्रित केलेल्या व्हिडीओमध्ये या घटनेचा वेगळाच पैलू समोर आला आहे. त्यामध्ये चार वाघांचा चमू ही संपूर्ण शिकार करत असल्याचे स्पष्ट झाले आहे.
लंगडी वाघीण आणि तिचे चार बछडे जंगलाच्या एका भागातून दुसऱ्या भागात जात असताना अचानक हरणांचा एक कळप समोर आला. तेवढ्यात काही हरणांनी त्यांच्या सवयीप्रमाणे एकमेकांना सावध करण्यासाठी आवाज करायला सुरवात केली. तेव्हाच लंगडी वाघिणीच्या चारही बछड्यांनी कळपातील एका मोठ्या हरणाचा पाठलाग सुरु केला.
हरिण वाघांना चकवू लागलं होतं. हे पाहून तीन वाघ नियोजनबद्द पद्धतीने वेगवेगळ्या ठिकाणी गवतात लपले. तर एक वाघ हरणांचा पाठलाग करू लागला. अखेरीस चौघांपैकी दोन वाघांनी मिळून त्या हरणाला पकडले आणि उरलेले दोन वाघही त्या ठिकाणी पोहोचले. त्यामुळे पहिल्यांदाच वाघ समुहातही एक शिकार करत असल्याची ही दुर्मिळ घटना कैमऱ्यात कैद झाली आहे.
व्हिडीओ पाहा : चार वाघ मिळून एका हरणाची शिकार करतात तेव्हा...