डोंबिवलीत राहणाऱ्या किशनसिंग चौहान यांचं नेवाळी नाक्यावर ज्वेलर्सचं दुकान आहे. त्यांच्या दुकानात पुतण्या श्रवणसिंग चौहान आणि नोकर पुरणसिंग राठोड काम करत होते. या दोघांनी काही दिवसांपूर्वी दुकानातून साडेआठ लाखांचं सोनं घेऊन पोबारा केला होता.
या प्रकरणी हिललाईन पोलिसांनी राजस्थानपर्यंत माग काढून त्यांना बेड्या ठोकल्या. चौकशीत त्यांनी आतापर्यंत अनेक वेळा दुकानातून सोनं चोरल्याची कबुली दिली. या चोरलेल्या एक किलो सोन्यासह सोनं विकून आलेली साडेचार लाख रुपयांची रोकड, आणि त्याच पैशातून घेतलेली एक कारही पोलिसांनी जप्त केली.
या सगळ्या मुद्देमालाची एकूण किंमत तब्बल 29 लाख रुपये इतकी आहे. या प्रकरणी या दोघांना न्यायालयीन कोठडी सुनावण्यात आली असून पोलिस गुन्ह्याचा पुढील तपास करत आहेत.