मुंबई : शिवसेनेनं सामनाच्या अग्रलेखातून बुरखा आणि नकाब बंदीची मागणी पंतप्रधान नरेंद्र मोदी यांच्याकडे केली आहे. सामनातील या अग्रलेखामुळे मोठा वाद निर्माण झाला आहे. मात्र बुरखा बंदीची मागणी शिवसेनेची अधिकृत भूमिका नसल्याचं शिवसेनेच्या नेत्या निलम गोऱ्हे यांनी स्पष्ट केलं. त्यानंतर सामनाचे कार्यकारी संपादक संजय राऊत यांनी निलम गोऱ्हेंना रोखठोक प्रत्युत्तर दिलं आहे.
शिवसेना पक्षाच्या भूमिका नेत्यांच्या बैठकीतून ठरत असतात. पक्षप्रमुख उद्धव ठाकरे यांच्या आदेशानुसार त्या अंतिमत: ठरतात. आजच्या सामनाच्या अग्रलेखातील भूमिका ना चर्चेतून आली, ना आदेशातून आली आहे. त्यामुळे कदाचित हे चालू घडामोडींवर वैयक्तिक मत असेल शिवसेना पक्षाची अधिकृत भूमिका नाही, असं निलम गोऱ्हे यांनी स्पष्ट केलं.
संजय राऊत भूमिकेवर ठाम
बुरखा बंदीची मागणी शिवसेनेची नाहीच. श्रीलंकेतील दहशतवादी हल्ल्यानंतरची ती परखड भूमिका आहे. शिवसेनाप्रमुखांनी अनेकदा हीच भूमिका ठामपणे घेतली आहे. श्रीलंकेतील दहशतवादी हल्ला व तेथील सरकारने घेतलेल्या भूमिकेचा हे विश्लेषण आहे, असं ट्वीट करत संजय राऊतांनी आपली भूमिका स्पष्ट केली. महिला नेत्यांनी मुस्लीम महिलांचे दुःख समजून घ्यावे. तिहेरी तलाकला विरोध आणि बुरखा बंदी नको, याचे समर्थन महिला नेत्यानी तरी करु नये, असं 'रोखठोक' प्रत्युत्तर संजय राऊतांनी निलम गोऱ्हे यांना दिलं आहे.
संजय राऊत आणि निलम गोऱ्हे यांच्या भूमिकेवरुनंतर 'सामना'च्या अग्रलेखावरुन दोन मतप्रवाह निर्माण झाल्याचं दिसून येत आहे. त्यामुळे आता उद्धव ठाकरे यावर काय भूमिका घेतात याकडे सर्वांचं लक्ष लागलं आहे.
साखळी स्फोटांनंतर श्रीलंकेचे राष्ट्रपती मैत्रीपाल यांनी घेतलेल्या बुरखाबंदीच्या निर्णयाची री शिवसेनेने ओढली होती. 'सामना'च्या अग्रलेखातून शिवसेनेने श्रीलंकेप्रमाणेच भारतातही बुरखा आणि नकाबबंदी घालण्याची मागणी पंतप्रधान मोदींकडे केली आहे. मोदी अयोध्या दौऱ्यावर असल्याने रावणाच्या लंकेत जे घडलं ते रामाच्या अयोध्येत कधी घडणार? असा सवालही शिवसेनेने पंतप्रधान मोदींना केला.
फ्रान्समध्येही दहशतवादी हल्ला होताच तेथील सरकारने बुरखा बंदी केली. न्यूझीलंड, ऑस्ट्रेलियात व ब्रिटनमध्येही हेच घडले आहे. मग याबाबतीत हिंदुस्थान मागे का? असा सवाल देखील उपस्थित केला आहे.
संबंधित बातम्या
रावणाच्या लंकेत जे घडलं ते रामाच्या अयोध्येत कधी घडणार?, बुरखा बंदीवरुन शिवसेनेचा मोदींना सवाल
मोदींना हरवण्याची भाषा करणाऱ्या पोपट मास्तरांची कोलांटउडी, ओवेसींचा शिवसेनेवर बोचरा वार