Silver Oak St Protest: गुणरत्न सदावर्ते यांच्या पत्नी डॉ. जयश्री पाटील यांना मुंबई सत्र न्यायालयानं मोठा दिलासा दिला आहे. सिल्व्हर ओकवरील आंदोलनप्रकरणी येत्या 29 एप्रिलपर्यंत अटक न करण्याचे निर्देश मुंबई पोलिसांना जारी करण्यात आले आहेत. हे प्रकरण अतिशय संवेदनशील असून यात तपास सुरू आहे. त्यामुळे याचिकाकर्त्यांना कोणताही दिलासा देऊ नये, अशी भूमिका घेत राज्य सरकारच्यावतीनं जयश्री पाटील यांच्या याचिकेला राज्य सरकारनं जोरदार विरोध केला होता. मात्र एफआयआरमध्ये त्यांचं अद्याप नाव टाकलेलं नाही. तिसऱ्या रीमांडला पाटील यांच्या सहभागाचा उल्लेख झाला तसेच एफआयआर क्रमांकांमध्ये काही तांत्रिक दोष असल्याच्या मुद्यावर कोर्टानं त्यांना अंतरिम दिलासा मंजूर केला.
115 आंदोलक एसटी कर्मचाऱ्यांचा जामीनासाठी अर्ज
दरम्यान याच प्रकरणी अटक होऊन सध्या न्यायालयीन कोठडीत असलेल्या 115 एसटी कर्मचाऱ्यांनीही जामीनासाठी मुंबई सत्र न्यायालयाचे दरवाजे ठोठावलेत. यात 24 महिलांचा समावेश असून या सर्व आंदोलकांना, आर्थर रोड, तळोजा, भायखळा अश्या विविध कारागृहात जागेच्या उपलब्धतेनुसार ठेवण्यात आलं आहे. या सर्वांच्या जामीन अर्जावर येत्या बुधवारी, 20 एप्रिल रोजी सुनावणी होणार आहे. यापैकी बरेसचे जण हे मुंबईबाहेरून आले आहेत. त्यांच्यापैकी अनेकांकडे जामीनाची अनामत रक्कम भरण्यासाठीही पैसे नाहीत. हमीदार नाही अशी त्यांची बिकट अवस्था असल्याचं त्यांच्या जामीन अर्जात नमूद केलेलं आहे.
जयश्री पाटील यांना या मुद्यांवर मिळाला अटकेपासून दिलासा
डॉ. जयश्री पाटील यांच्या या अटकपूर्व जामीन अर्जावर न्यायाधीश आर.एन. सादारणी यांच्यापुढे सोमवारी सुनावणी झाली. अद्याप गावदेवी पोलीस ठाण्यात जयश्री पाटील यांच्या अटकपूर्व जामीनाच्या याचिकेची प्रतर दिलेली नाही. तसेच हे प्रकरण अतिशय संवेदनशील असून तपास सुरू असल्यानं आरोपीला कोणताही दिलासा देऊ नये, अशी मागणी सरकारी वकिलांनी कोर्टाकडे केली. मात्र पोलीसांनी याचिकेची प्रत स्वीकारण्यास नकार दिल्याचा आरोप जयश्री पाटील यांच्या वकिलांनी कोर्टात केला. निरंजन मुंदरगी करत आहेत जयश्री पाटील यांच्यासाठी युक्तिवाद केला. त्यांनी कोर्टात स्पष्ट केलं की, या प्रकरणात दाखल एफआयआरमध्ये जयश्री पाटील यांच्या नावाचा समावेश नाही. याप्रकरणी अटकेत असलेले त्यांचे पती आणि एसटी कामगारांचे वकील डॉ. गुणरत्न सदावर्ते यांच्या तिस-या रिमांडच्यावेळी पोलीसांनी पाटील यांचाही याप्रकरणी सहआरोपी म्हणनू समावेश केला. या कटात त्याही सहभागी असल्याचा पोलीसांचा आरोप आहे. तसेच एसटी आंदोलनातून 'आर्थिक लाभ' उठवल्याचा जयश्री पाटील यांच्यावर आरोप आहे. एसटी कर्मचाऱ्यांकडनं प्रत्येकी 530 रूपये जमा केले, मात्र कोणतीही पावती दिली नसल्याचा आरोप त्यांच्यावर ठेवण्यात आला. मात्र सिल्व्हर ओकवरील आंदोलनाशी याचा संबंध जोडू नये, यासाठी स्वतंत्र गुन्हा दाखल करणं आवश्यक आहे. तसेच मुंबई पोलीसांनी दाखल केलेल्या विविध गुन्ह्यांमध्ये क्रमांकांचा तांत्रिक घोळ आहे. या गोष्टी विचारात घेत कोर्टानं 29 एप्रिलपर्यंत जयश्री पाटील यांना अंतरिम दिलासा दिला आहे.
काय आहे प्रकरण
राष्ट्रावादी काँग्रेसचे सर्वेसर्वा शरद पवार यांच्या निवासस्थानी 8 एप्रिल रोजी दुपारच्यावेळी अचानकपणे शेकडो एसटी कर्मचाऱ्यांनी आंदोलन केलं होतं. त्यावेळी या आंदोलक कर्मचाऱ्यांनी सिल्व्हर ओकच्या दिशेनं चपला भरकावल्या तर महिला आंदोलकांनी बांगड्या फोडत पवार कुटुंबियांविरोधात जोरदार नारेबाजी केली होती. साधराण तासाभराच्या प्रयत्नांनंतर पोलीसांनाी परिस्थितीवर नियंत्रण मिळवलं होतं. याप्रकरणी गावदेवी पोलीस स्थानकांत गुन्हा दाखल करण्यात आला असून पोलीस तपास करत आहेत.