प्रकृती अस्वास्थ्याचे कारण लक्षात घेत पीटरला त्याच्या पसंतीच्या खासगी रुग्णालयात 15 दिवसांसाठी दाखल करण्यास हायकोर्टाने परवानगी दिली होती. तसेच 12 जुलैपर्यंत पीटरच्या प्रकृतीचा वैद्यकीय अहवाल सादर करण्याचे निर्देश जेल प्रशासनाला देण्यात आले होते. त्यानुसार शुक्रवारी न्यायमूर्ती रेवती मोहिते-डेरे यांच्यासमोर पीटरच्या जामीन अर्जावर सुनावणी झाली.
शीना बोरा हत्याकांड प्रकरणात अटकेत असलेल्या पीटर मुखर्जीचा हा सहावा जामीन अर्ज आहे. विशेष सीबीआय कोर्टाने वैद्यकिय कारणांसाठी केलेला जामीन अर्ज फेटाळून लावल्याने पीटरनं याच कारणासाठी आता हायकोर्टात अर्ज केला आहे. त्याचबरोबर तपासयंत्रणेकडे आपल्याविरोधात सबळ पुरावे नाहीत, असा पीटरचा दावा अजूनही कायम आहे.
पीटर मुखर्जीला 16 मार्चला हृदयविकाराचा सौम्य झटका आला. त्यानंतर कोर्टाच्या संमतीने त्याला शस्त्रक्रियेसाठी खासगी रूग्णालयात हलवण्यात आले होते. तेव्हापासून पीटर मुखर्जीची प्रकृती काहीशी नाजूक आहे.