मुंबई : एन्काऊंटर स्पेशालिस्ट माजी पोलीस अधिकारी प्रदीप शर्मा यांना राष्ट्रीय तपास यंत्रणेने (NIA) ताब्यात घेतलं असून आजच त्यांना अटक होण्याची शक्यता आहे. एनआयने मुंबईतील अंधेरी परिसरातील त्यांच्या घरावर छापे टाकले आहेत. सकाळी सहा वाजल्यापासून कारवाईला सुरुवात झाली आहे. यादरम्यान प्रदीप शर्मा यांच्या घराबाहेर मोठा बंदोबस्त तैनात आहेत. सीआरपीएफच्या आठ ते दहा कंपन्या इथे तैनात आहेत. उद्योजक मुकेश अंबानी यांच्या अँटिलिया या निवास्थानाबाहेरील स्फोटकं आणि मनसुख हिरण प्रकरणात प्रदीप शर्मा एनआयएच्या रडारवर आहेत.
याआधी या प्रकरणात एप्रिल महिन्यात सलग दोन दिवस प्रदीप शर्मा यांची एनआयएकडून चौकशी झाली होती. परंतु आता थेट छापा टाकून एनआयएनने झाडाझडती सुरु केली आहे. स्फोटकांनी भरलेली कार आणि मनसुख हिरण हत्येमध्ये त्यांचा सहभाग असल्याची शक्यता सूत्रांनी वर्तवली आहे.
उद्योगपती मुकेश अंबानींच्या निवासस्थानाबाहेर फेब्रुवारी महिन्यात जिलेटिनच्या 20 कांड्या आणि धमकीचं पत्र ठेवलेली एक स्कॉर्पिओ गाडी बेवारसपणे सोडण्यात आली होती. त्यानंतर गाडीचे मालक मनसुख हिरण यांचा मृतदेह सापडला. या प्रकरणात मुंबई पोलीस दलातील सहाय्यक पोलीस निरीक्षक सचिन वाझे यांना एनआयएकडून अटक करण्यात आली होती. प्रदीप शर्मा हे सचिन वाझे यांच्या जवळचे समजले जातात. यानंतर प्रदीप शर्मा यांचीही एनआयएने एप्रिल महिन्यात चौकशी केली होती. काही महिने हे चौकशी थांबली होती. परंतु आज सकाळी एनआयएने त्यांच्या घरावर छापा टाकून त्यांची चौकशी केली.
कोण आहेत प्रदीप शर्मा?
- प्रदीप शर्मा 1983 साली पोलीस सेवेत रुजू झाले
- पोलीस दलात एन्काऊंटर स्पेशालिस्ट अशी ओळख
- 312 गुंडांचा प्रदीप शर्मा यांच्याकडून एन्काऊंट
- कुख्यात गुंडांशी त्यांचा संबंध असल्याचाही आरोप
- 2008 मध्ये पोलीस दलातून निलंबन
- 2017 मध्ये आरोपांतून क्लीनचिट
- 2017 साली त्यांनी दाऊदच्या भावाला अटक केली
- 2019 मध्ये पोलीस सेवेचा राजीनामा
- नालासोपाऱ्यात शिवसेनेच्या तिकीटावर निवडणूक लढवली
- मुंबईत अँटिलियाबाहेर स्फोटकं सापडल्याप्रकरणी एनआयएकडून चौकशी
धागेदोरे प्रदीप शर्मांपर्यंत पोहोचणार होतेच : प्रवीण दरेकर
ही कारवाई अपेक्षित होती. प्रदीप शर्मा हे सचिन वाझे यांचे मार्गदर्शक होते. वाझेंच्या कारवाईमागे प्रदीप शर्मा यांचा हात असल्याचा संशय होता. त्यामुळे एनआयएच्या तपासाचे धागेदोगे प्रदीप शर्मा यांच्यापर्यंत पोहोचणार होतेच. मध्यंतरीच्या काळात ते दिसले नसले तरी प्रक्रिया सुरुच होती. आज एनआयची टीम त्यांच्यापर्यंत पोहोचली. सचिन वाझे आणि प्रदीप शर्मा यांचे संबंध होते, त्यामुळे धागेदोरे एनआयएच्या हाती लागतील, अशी प्रतिक्रिया विधानपरिषदेचे विरोधी पक्षनेते प्रवीण दरेकर यांनी दिली.
आता प्रदीप शर्मा जेलमध्ये जाणार : किरीट सोमय्या
"आधी शिवसेनेचे प्रवक्ते सचिन वाझे जेलमध्ये गेले आता शिवसेनेचे उपनेते आणि उमेदवार प्रदीप शर्मा जेलमध्ये जाणार आहेत. यानंतर अनिल परब यांच्यापर्यंत तपास यंत्रणा पोहोचल्यावर मला आश्चर्य वाटणार नाही. ही उद्धव ठाकरेंची गुंड सेना आहे, माफिया टोळी आहे. सगळेच जेलमध्ये जाणार आहेत. दापोलीतील रिसॉर्टमध्ये अनिल परब यांचा सदानंद कदम हा पार्टनर आहे. या सदानंद कदमचा पार्टनर असलेल्या कांदिवलीतील शिवसेना शाखाप्रमुखाने प्राडो गाडी मनसुख हिरणला मारण्यासाठी सचिन वाझे, प्रदीप शर्मा यांना दिली होती," अशी प्रतिक्रिया भाजप नेते किरीट