मुंबई : मुंबईला (Mumbai News) पाणीपुरवठा करणाऱ्या तलावातील पाणीसाठ्यात कमालीची घट झाली आहे. सातही धरणांमधील राखीव साठा मिळून 48 दिवस पुरेल इतकेच पाणी शिल्लक आहे. जून महिना ओसरला तरी अद्याप पावसाचा पत्ता नाही. अशात, मुंबईकरांसमोर पाणीकपातीचं संकट उभं ठाकलं आहे. कारण मुंबईला पाणीपुरवठा करणाऱ्या सात धरणांमध्ये फक्त 6.92 टक्के पाणीसाठा उरला आहे. तर राखीव पाणीसाठा मिळून मुंबईसाठी फक्त 12.73 टक्के पाणीसाठा शिल्लक राहिला आहे.
मुंबईतील धरण क्षेत्रात पुरेसा पाऊस न झाल्यास जून महिन्याच्या अखेरीस पाणी कपाती संदर्भात मुंबई महापालिका निर्णय घेणार आहे. पुरेसा पाऊस न झाल्यास जुलै महिन्याच्या पहिल्या आठवड्यात पाणी कपातीची शक्यता आहे. मुंबईला पाणीपुरवठा करणाऱ्या अप्पर वैतरणा, मोडक सागर,तानसा ,मध्य वैतरणा, भातसा, विहार आणि तुळसी मिळून फक्त 6.92 टक्के पाणीसाठा शिल्लक आहे.
जवळपास 40 दिवस पुरेल एवढा पाणीसाठा
मुंबईला लागणारा पाणीपुरवठा विचारात घेता मुंबई महापालिकेला राज्य सरकारच्या राखीव पाणी साठ्यातून म्हणजेच भातसा धरणातला शिल्लक पाणीसाठा वापरता जरी येणार असला तरी राखीव शिल्लक पाणीसाठा आणि सात धरणातील पाणीसाठा मिळून एकूण 12.73% पाणीसाठा सध्या मुंबईसाठी शिल्लक आहे. मुंबई आणि आसपासच्या भागात पाणीपुरवठा करताना यातील एक टक्के पाणीसाठा हा तीन दिवसासाठी पुरतो त्यामुळे जवळपास 40 दिवस पुरेल एवढा पाणीसाठा सध्या शिल्लक आहे.
राज्यातील पाणीसाठ्यातही घट
दुसरीकडे राज्यातील पाणीसाठ्यातही मोठी घट झाली आहे. मागच्या वर्षीच्या तुलनेत धरणांमधील पाणीसाठा मोठ्या प्रमाणात कमी झाला आहे. विदर्भ, मराठवाडा, पश्चिम महाराष्ट्र, कोकण आणि उत्तर महाराष्ट्रात सारखीच परिस्थिती आहे. मान्सून उशिरा दाखल होणार असल्याने चिंतेत आणखीच भर पडली आहे. एकीकडे पिण्याच्या पाण्याचा प्रश्न तर दुसरीकडे शेतीसाठी लागणाऱ्या पाण्याचा प्रश्न देखील निर्माण होऊ शकतो.
सात तलावांतून वर्षभराचा पाणीपुरवठा
मुंबईला अप्पर वैतरणा, मोडक सागर, तानसा, मध्य वैतरणा, भातसा, विहार व तुळशी या सात तलावांमधून दररोज 3,850 दशलक्ष लिटर इतका पाणीपुरवठा केला जातो. वर्षभरासाठी तलावात 14 लाख 47हजार 363 दशलक्ष लिटर इतक्या पाणीसाठ्याची आवश्यकता असते.
हे ही वाचा :
नदीही आटली, धरणाचं पाणी आटत चाललंय! गंगापूर धरणात अवघा 32 टक्के पाणीसाठा