मुंबई : राज्याच्या तंत्र शिक्षण संचालनालयाने दहावीनंतरच्या अभियांत्रिकी पदविका म्हणजेच पॉलिटेक्निक अभ्यासक्रमाच्या प्रथम वर्ष प्रवेश प्रक्रियेचं वेळापत्रक जाहीर केलं आहे. हा अभ्यासक्रम राबवणाऱ्या राज्यातील सर्व महाविद्यालयात पॉलिटेक्निक प्रथम वर्ष प्रवेशासाठी विद्यार्थ्यांना आजपासून ऑनलाईन नोंदणी करणे, कागदपत्रांच्या स्कॅन कॉपी अपलोड करणे, कागदपत्रांची पडताळणी करणे आणि अर्ज निश्चित करण्याबबत सविस्तर वेळापत्रक संकेतस्थळावर जाहीर करण्यात आलं आहे. विद्यार्थ्यांना यंदा कागदपत्रांच्या पडताळणीसाठी 'ई-स्क्रूटिनी'चा पर्याय उपलब्ध करुन देण्यात आला आहे. ज्याद्वारे ऑनलाईन अर्जाची पडताळणी होऊन अर्ज निश्चित केला जाईल. शिवाय, ज्या विद्यार्थ्याकडे संगणक किंवा मोबाईल फोन नाही ते जवळच्या सुविधा केंद्रात जाऊन ऑनलाईन नोंदणी करुन प्रत्यक्ष कागदपत्रांची पडताळणी करुन अर्ज निश्चित करतील.
प्रवेशप्रक्रियेचे वेळापत्रक कसे आहे ?
- पॉलिटेक्निक प्रथम वर्ष प्रवेशासाठी विद्यार्थ्यांना 30 जून ते 23 जुलै दरम्यान www.dtemaharashtra.gov.in वेबसाईटवर जाऊन ऑनलाईन नोंदणी करायची आहे, सोबतच अर्जाच्या छाननीची पद्धत निवडून आवश्यक कागदपत्रांच्या कॉपी वेबसाईटवर अपलोड करायच्या आहेत.
- 30 जून ते 23 जुलै दरम्यान विद्यार्थी ई-स्क्रूटिनीद्वारे किंवा प्रत्यक्ष स्क्रूटिनीद्वारे ऑनलाईन अर्ज आणि अपलोड केलेल्या कागदपत्रांची पडताळणी करुन अर्ज निश्चित करतील
- 26 जुलै रोजी तात्पुरत्या पॉलिटेक्निक प्रथम वर्ष प्रवेशासाठीची गुणवत्ता यादी जाहीर करायची आहे
- 27 ते 29 जुलै दरम्यान तात्पुरती यादी जाहीर झाल्यानंतर त्यात काही तक्रार असल्यास त्या सादर करणे
- 31 जुलै रोजी पॉलिटेक्निक प्रथम वर्ष प्रवेशाची अंतिम गुणवत्ता यादी जाहीर करणे
या सर्व प्रवेश प्रक्रियेदरम्यान प्रत्यक्ष स्क्रूटिनी पद्धत निवडणाऱ्या विद्यार्थ्यांनी सर्व निर्बंधांचे पालन करत सुविधा केंद्रावर सुरक्षित अंतर पाळायचं आहे. शिवाय सुविधा केंद्रावर एकाच वेळी गर्दी होणार नाही याची खबरदारी घ्यायची आहे
जर उमेदवाराने ऑनलाईन भरलेल्या अर्जाची ई-स्क्रूटिनी किंवा प्रत्यक्ष स्क्रूटिनी केली नाही तर अशा उमेदवारांची नवे प्रवेश प्रक्रियेसाठी तयार करण्यात येणाऱ्या कॅप आणि नॉन कॅप राऊंडच्या यादीमध्ये दिसणार नाहीत.