कमला मिल आग प्रकरणी आरोपी विशाल करियाला जामीन मंजूर
अमेय राणे, एबीपी माझा, मुंबई | 15 Jan 2018 10:22 PM (IST)
कमला मिल आग प्रकरणातील आरोपी विशाल करियाला भोईवाडा कोर्टानं जामीन मंजूर केला आहे. १० हजारांच्या जातमुचलक्यावर करियाची सुटका झाली आहे.
मुंबई : कमला मिल आग प्रकरणातील आरोपी विशाल करियाला भोईवाडा कोर्टानं जामीन मंजूर केला आहे. १० हजारांच्या जातमुचलक्यावर करियाची सुटका झाली आहे. आग लागली त्या प्रकरणात त्याचा थेट संबंध नाही, तसंच त्याची त्या रेस्टॉरंटमध्ये मालकी किंवा भागीदारी नाही. त्याच्यावर केवळ आरोपींना आश्रय दिल्याचा आरोप होता. मात्र, याप्रकरणात आरोपीला जामीन मिळू शकतो, त्यामुळे त्याला जामीन दिला जात आहे. असं कोर्टानं स्पष्ट केलं आहे. ९ जानेवारीला करियाला मुंबईत अटक झाली होती. त्यानंतर भोईवाडा कोर्टानं त्याला १७ जानेवारीपर्यंत पोलीस कोठडी सुनावली होती. ज्याला करियानं सोमवारी हायकोर्टात आव्हान दिलं होतं. कमला मिल खटल्यातील आरोपी विशाल करियाला दिलासा देत मुंबई उच्च न्यायालयानं त्याला रितसर जामीन अर्ज करण्याची परवानगी दिली. केवळ अभिजीत मानकरची गाडी स्वत:जवळ ठेवली म्हणजे आपला या अग्निकांडाशी थेट संबंध आहे असा मुंबई पोलिसांचा आरोप चुकीचा आहे. असा दावा करत विशाल करियानं मुंबई उच्च न्यायालयात याचिका दाखल केली होती. या याचिकेवर सुनावणी घेताना न्यायमूर्ती रेवती मोहिते-ढेरे यांनी सरकारी वकिलांना विचारणा केली की, तुमच्याकडे करिया विरोधात आणखी सबळ पुरावे आहेत का? जेणेकरून तुम्ही त्याच्यावर आणखी कलम लावू शकता? यावर सरकारी वकिलांनी नकारार्थी उत्तर दिलं. करियावर आणखीन गंभीर कलम लावण्यासाठी पुरावे नसल्याची सरकारी वकिलांनी कबुली दिल्यानं हायकोर्टानं करियाची याचिका स्वीकारत त्याला खालच्या कोर्टात रितसर जामीन अर्ज करण्याचे निर्देश दिले. त्यानुसार तातडीनं करियाच्यावतीनं भोईवाडा कोर्टात जामीनासाठी दाखल केलेला अर्ज मान्य करण्यात आला. संबंधित बातम्या :