मुंबई : मुंबईत एका मानसिक आणि शारिरीक आजाराने त्रस्त महिलेने तिच्या पतीविरोधात लैगिंक छळाची तक्रार नोंदवली आहे. मुंबई पोलिसांनी पती आणि इतरांविरोधात दाखल केलेल्या गुन्ह्यांवरून हा वाईफ स्वापिंगचा धक्कादायक प्रकार असल्याचं समोर आलं आहे. तसेच पीडित महिलेनं पतीविरोधात अनैसर्गिक शारिरीक संबंधांसाठी जबरदस्ती केल्याचाही आरोप केला आहे.
39 वर्षीय पीडित महिला ही डिसलेक्सिया या आजाराने ग्रस्त आहे. साल 2004 मध्ये या महिलेचा शेअर बाजारात कार्यरत असलेल्या जिग्नेश नावाच्या व्यक्तीशी विवाह झाला होता. लग्नानंतर अनेक वर्ष तिने कौटुंबिक हिंसाचार सहन केला. आपल्या दोन मुलांच्या भविष्याचा विचार करून पीडित महिलेने जिग्नेशचा हा छळ सहन केला. मात्र साल २०१७ पासून जिग्नेशने परपुरुषांशी शारिरीक संबंध ठेवण्यास आपल्याला भाग पाडले, तसेच या संबंधांचे व्हिडिओ बनवून कुणाकडेही याची वाच्यता न करण्याची धमकी दिली होती, असा आरेप पीडितेच्या वतीने करण्यात आला आहे. यासाठी जिग्नेश सोशल मीडिया साईट्सचा उपयोग करत होता. फेसबुक आणि व्हॉट्सअॅपवर यासाठी सक्रिय असलेल्या ग्रुपमध्ये जिग्नेश बनावट अकांऊंट्ससह सहभागी होता याचे काही पुरावेही सापडले आहेत.
साल 2016 मध्ये पीडित महिलेच्या सासूचं निधन झाल्यानंतर हे प्रकार सुरू झाले. सासऱ्यांकडे याची तक्रार केली मात्र त्यांनी याकडे लक्ष दिलं नाही, असा पीडितेचा आरोप आहे. मात्र गेल्या दोन वर्षात हे प्रकार वाढल्याने पीडित महिलेनं अखेरीस तिच्या माहेरच्यांना या अत्याचारांची माहिती दिली. त्यानंतर अॅड. स्वप्ना कोदे यांच्या मदतीने पीडेतेनं मुंबई पोलिसांत याची तक्रार दाखल केली.
मुलूंड पोलिसांकडून हे प्रकरण कांदिवलीतील समता नगर पोलीस स्थानकात वर्ग करण्यात आलं आहे. या प्रकरणातील मुख्य आरोपी जिग्नेशला पोलिसांनी अटक केली असून बोरीवली कोर्टाने त्याला 23 डिसेंबरपर्यंतची पोलीस कोठडी सुनावली आहे. याप्रकरणी समता नगर पोलिसांनी अन्य एका व्यक्तीला ताब्यात घेतलं असून याप्रकरणी अधिक तपास सुरू आहे.