BJP On Bharat Jodo Yatra: भारत जोडो यात्रेवरुन भाजपनं पुन्हा एकदा काँग्रेससह आदित्य ठाकरे यांच्यावर देखील टीका केली आहे. भाजप मुंबई अध्यक्ष आशिष शेलार यांनी म्हटलं आहे की, आजकाल भारत जोडो सुरू आहे. 'बेगाने शादी अब्दुल्ला दिवाना' यानुसार आदित्य ठाकरेंचा प्रचार सुरू आहे. हे भारतीय उखाडो अभियान आहे. आदित्य ठाकरे राहुल गांधींचा हातात हातात घेऊन चालत आहे. पण इतिहास तुम्हाला प्रश्न विचारणार, अशा शब्दांत शेलार यांनी हल्लाबोल केला
यावेळी आमदार आशिष शेलार यांनी आदित्य ठाकरे यांनी भारत जोडोमध्ये घेतलेल्या सहभागावर प्रश्न उपस्थितीत करताना ते म्हणाले की, ज्या काँग्रेसने राम जन्मभूमी मंदिरसंबंधी कोर्ट केसमध्ये राम जन्मला नाही, रामाची गादी नव्हती ,रामाचा कोणता इतिहास नव्हता, भगवान राम कल्पोकल्पित आहे असे म्हणणाऱ्या काँग्रेसचा हात आदित्य ठाकरे यांनी पकडला आहे. रामसेतू बांधलाच नाही असे म्हणणाऱ्या त्या काँग्रेसबरोबर हातात हात घालून तुम्ही फिरताय इतिहास तुम्हाला प्रश्न विचारेल. कुराणमध्ये जिहाद नाही अशी शिवराज पाटील यांनी मांडणी केली. काँग्रेस गीता जिहाद आहे म्हणतो. त्या काँग्रेसचा हात हातात घेतला. देशातील संपत्तीवर पहिला हक्क मुसलमानांचा आहे असे म्हणणाऱ्या काँग्रेसचा हात हातात घेवून आदित्य ठाकरे चालले आहेत. सर्जिकल स्ट्राईकवर प्रश्न विचारणाऱ्या काँग्रेसचा हात हातात घेऊन आदित्य ठाकरे चालले आहेत. तो शर्जील उस्मानी महाराष्ट्रात येवून हिंदूचे डोकं सडक आहे असे भाषण करणाऱ्यांसोबत असणाऱ्या राहुल गांधीचा हात हातात घेवून तुम्ही चालत आहात म्हणून इतिहास तुम्हाला प्रश्न विचारणार आहे. औरंगजेबाच्या अपूर्ण स्वप्न पूर्ण करण्याचे काम उद्धव ठाकरे यांची शिवसेना करत आहे. हिंदू आणि नव हिंदू अशी मांडणी केली जात आहे. जागर त्याच्या विरोधात आहे. हिंदू मराठी आणि मुस्लिम मते भारतीय जनता पार्टीला मिळतील, असं शेलारांनी म्हटलं.
आशिष शेलार म्हणाले की, आम्ही कुठल्याही धर्माच्या, जातीच्या विरोधात नाही आहोत. आम्ही 'सबका साथ सबका विकास' आहोत. तुष्टीकरणाच्या आणि लांगुलचालनाच्या विरोधात आम्ही आहोत. मुस्लिम मराठी मांडणी केली जात आहे मग मराठी गुजरातीला विरोध का? मराठी जैनच्या विरोधात उभे का राहता? मराठी उत्तर भारतीय तुम्हाला का चालत नाहीत? मराठी हिंदू या शब्दांशी तुमचे वैर का आहे? असा सवाल शेलार यांनी केला.
शेलार म्हणाले की, प्रत्येक वार्डात उद्धव बाळासाहेब ठाकरे शिवसेनेकडून मराठी आणि मुस्लिम मताचं गणित जुळवलं जात आहे. सलग 25 वर्ष राज्य करून तुम्हाला जाती धर्माच्या आधारावर मतं मागण्याची वेळ का आली? केलेल्या कामाच्या आधारावर मतं मागा? सांगा तुम्ही किती प्रकल्प केले, रस्ते बांधले, किती शाळा बांधल्या? यातील काहीही त्यांना सांगता येत नाही. मुंबई महापालिकेची सत्ता हातातून जात असल्याने शेवटचा डाव हा रडीचा म्हणजेच कलीचा डाव खेळला जात आहे. जाती आणि धर्माच्या आधारावर मतंमागण्याचा कार्यक्रम हा अजेंडा उद्धव ठाकरे यांच्या शिवसेनेचा आहे. तेच आम्ही जागर यात्रेतून मांडत आहोत. मराठी आणि मुस्लिमांना फसवण्याचे काम सुरू आहे. हिंदुत फूट पाडण्याचे काम सुरू आहे ते कधीही यशस्वी होऊ देणार नाही असा इशारा शेलार यांनी दिला.