पंढरपूर : कोरोना संकटामुळे सलग दुसऱ्या वर्षी आषाढी वारीवर निर्बंध आल्याने आज योगिनी एकादशीला राज्यभरातील हजारो वारकऱ्यांनी येऊन विठुरायाच्या कळसाचे आणि नामदेव पायरीचे दर्शन घेत आषाढी यात्रेचा आनंद घेतला. आषाढी सोहळ्यासाठी 17 जुलै पासून 25 जुलै पर्यंत शासनाने परवानगी दिलेल्या भाविकांशिवाय कोणालाही पंढरीत प्रवेश असणार नसून हा संपूर्ण कालावधीत पंढरपूर शहरासह परिसरातील 10 गावात संचारबंदी असणार आहे . यामुळे आषाढी सोहळ्याला सर्वसामान्य भाविकाला येत येत नसल्याने आज योगिनी एकादशीला भाविकांनी गर्दी केली आहे.
आजच्या योगिनी एकादशी नंतर 15 दिवसांनी आषाढी एकादशीचा महासोहळा होणार आहे . यामुळेच मराठवाडा , विदर्भ , कोकण या भागासह कर्नाटक , आंध्रप्रदेश , तामिळनाडू या भागातील हजारो भाविकांनी योगिनी एकादशीला दर्शनासाठी गर्दी केली आहे. 18 जुलै पासून 25 जुलैपर्यंत चंद्रभागेत स्नान करता येणार नसल्याने आज योगिनी एकादशीला चंद्रभागा वाळवंट वारकऱ्यांनी फुलून गेले होते. काही विठ्ठल भक्तांनी मंदिर परिसरात रांगोळ्यांच्या पायघड्या घालत देवाची सेवा केली. देवा दोन वर्षे आषाढी चुकली आता तरी या कोरोना संकटाचा नामशेष करून पुढील आषाढीला माऊली पालखी संगे पायी वारी करू दे असे साकडे वारकरी देवाला बंद मंदिराबाहेरून घालत होते.
वारकरी संप्रदायाचा सर्वात सोहळा अशी ओळख असलेल्या आषाढी वारीवर यंदाही कोरोनाचे संकट असल्याने सरकारने दहा मानाच्या पालखी सोहळ्यांना पंढरपूरला येण्याची परवानगी दिली आहे.
या दहा पालख्यांना परवानगी
- संत निवृत्ती महाराज (त्र्यंबकेश्वर)
- संत ज्ञानेश्वर महाराज (आळंदी)
- संत सोपान काका महाराज (सासवड)
- संत मुक्ताबाई (मुक्ताईनगर)
- संत तुकाराम महाराज (देहू)
- संत नामदेव महाराज (पंढरपूर)
- संत एकनाथ महाराज (पैठण)
- रुक्मिणी माता (कौडनेपूर-अमरावती)
- संत निळोबाराय (पिंपळनेर - पारनेर अहमदनगर)
- संत चंगतेश्वर महाराज (सासवड)
संबंधित बातम्या :