सांगली : सांगली शहरातील एका हॉस्पिटलने आपल्या रुग्णालयातील बायोमेडिकल कचरा महापालिकेच्या घंटागाडीत टाकल्याचे समोर आले. यानंतर मनपा आयुक्त नितीन कापडणीस यांच्या आदेशाने त्या हॉस्पिटलला एक लाखाच्या दंडाची कारवाई करण्यात आली. शिंदेमळा येथील दुधनकर हॉस्पिटलला हा दंड ठोठावण्यात आला आहे.
शिंदेमळा इथल्या दुधनकर हॉस्पिटलने आपल्या रुग्णालयातील बायोमेडिकल कचरा महापालिकेच्या घंटागाडीत टाकून घनकचरा व्यवस्थापन कायद्याचा भंग केला. याची माहिती मिळताच आरोग्यधिकारी डॉ रवींद्र ताटे आणि स्वच्छता निरीक्षक अतुल आठवले यांनी याबाबत पडताळणी केली असता हा बायोमेडिकल कचरा दुधनकर हॉस्पिटलचाच असल्याचे निष्पन्न झाले. यानंतर याबाबत आयुक्त नितीन कापडणीस यांच्या सूचनेनुसार दुधनकर हॉस्पिटलला एक लाखाचा दंड करण्यात आला आहे. या दंडाची वसुली स्वच्छता निरीक्षक अतुल आठवले यांनी केली.
महापालिका क्षेत्रातील हॉस्पिटल प्रशासनाने आपल्या हॉस्पिटलमधील बायोमेडिकल कचरा हा उघड्यावर किंवा महापालिकेच्या कचरा कंटेकर अथवा घंटागाडीमध्ये न टाकता यासाठी नियुक्त सूर्या एजन्सीकडे जमा करायचा आहे. याचे उल्लंघन झाल्यास त्या रुग्णालयावर दंडात्मक कारवाई बरोबर कायदेशीर कारवाई केली जाईल, असा इशारा मनपा आयुक्त नितीन कापडणीस यांनी दिला आहे.
सांगलीत मंगळवारी 1090 कोरोनाबाधितांची नोंद
सांगली जिल्ह्यात मंगळवारी (20 एप्रिल) दिवसभरात 1090 कोरोनाबाधितांची नोंद झाली. कोरोनाच्या दुसऱ्या लाटेत पहिल्यांदाच रुग्णसंख्येने एका दिवसात एक हजाराचा टप्पा पार केला. तर 19 जणांचा कोरोनामुळे मृत्यू झाला.