मातोश्री नगर येथे राहणाऱ्या माटेगावकर कुटुंबातील रंजनाताई या सकाळी साडेपाचला उठल्या. सकाळी उठल्याबरोबर त्या अंथरूण काढत होत्या. अंथरुण काढत असताना अंथरुणाखाली त्यांना साप दिसला. त्यानंतर त्यांनी या अंथरुणावर झोपलेल्या इतर सदस्यांना तात्काळ उठवले. सापाला पाहताच सर्वांची घाबरगुंडी उडाली. माटेगावकर कुटुंबाने तात्काळ ही बाब सर्पमित्रांना कळवली. सर्पमित्र रंजीत कारेगावकर यांनी तात्काळ माटेगावकर यांच्या घरी धाव घेतली. त्यावेळी त्यांना माहीत पडलं की हा साप अत्यंत विषारी म्हणून ओळखला जाणार मण्यार आहे. या सापाला पकडून कारेगावकर यांनी प्रथम कुटुंबाला भयमुक्त केले. महत्त्वाचं म्हणजे हा साप रात्रभर या अंथरुणा खाली होता. पण सुदैवाने या सापाने कुणालाही काहीही इजा पोहोचवली नाही.
मन्यार हा नागापेक्षा ही विषारी साप म्हणून ओळखला जातो. तो रात्री वावरतो, त्यामुळे नाईट रायडर अशी त्याची ओळख आहे. सध्या पावसाळ्याचे दिवस असून या दिवसात हा साप रात्री घरात देखील प्रवेश करु शकतो. त्यामुळे नागरिकांनी या दिवसात खाली झोपताना योग्य ती खबरदारी घेऊन झोपण्याचे आवाहन सर्पमित्र रंजीत कारेगावकर यांनी केले आहे