Nashik News : सध्या पावसाचे दिवस असून या दिवसात लहान मुलांपासून ते मोठ्यांपर्यंत सर्वांची काळजी घेणे क्रमप्राप्त ठरते. मात्र तरीदेखील अनेक जंतूंचा प्रार्दूभाव होत असल्याने अनेकांना संसर्गजन्य आजाराची लागण होते. अशातच नाशिकमध्ये (Nashik) लहान मुलांचे डोळे येण्याची साथ सुरू झाली आहे. अनेक शाळांमधील मुलांना याची बाधा झाल्याने शाळेतील संख्या रोडावल्याचे चित्र आहे.
नाशिक शहरात पावसाची रिपरिप (Nashik Rain) सुरू असून शाळा सुरू होऊन अवघे काही दिवस उलटले आहेत. त्यातच लहान मुलांमध्ये डोळे येण्याची (Eye Infection) साथ पसरत आहे. यामुळे पालकांमध्ये देखील चिंता व्यक्त केली जात असून शाळांमधूनही अशा मुलांना सुटी दिली जात आहे. पावसाळ्यात (Rainy) अनेक साथीचे आजार उद्भवतात. थंडी, ताप, खोकला, तसेच सर्दी, डोकेदुखी या आजाराने नाशिककर त्रस्त झाले असून रुग्णालयात अशा रुग्णांची मोठी गर्दी होत असल्याचे दिसून येते. फॅमिली डॉक्टर्सकडे अशा रुग्णांची मोठी रांगच लागली असल्याचे चित्र पाहायला मिळत आहे.
पहिली ते दहावीपर्यंत शिक्षण येणाऱ्या शालेय विद्यार्थ्यांमध्ये सध्या डोळे येण्याची साथ सुरु झाल्याचे आढळून येत आहे. जिल्हा रुग्णालयात डोळे तपासणी करण्यासाठी येणाऱ्यांची संख्यादेखील वाढली असून, डोळे येण्याच्या तक्रारीमध्ये वाढ झाली आहे. अनेक विद्यार्थी डोळे येण्याच्या आजाराने ग्रासले असल्याने शाळांमधील उपस्थितीवर परिणाम जाणवू लागला आहे. शाळा प्रशासनाकडून अशा विद्यार्थ्यांना शाळेत न येण्याचा सल्ला दिला जात आहे.
दरम्यान लक्षणे आढळून येत असलेल्या पालकांनादेखील याबाबत सांगितले जात आहे. शहरातील अनेक शाळांनी डोळ्यांचा त्रास होणाऱ्या विद्यार्थ्यांना घरी पाठविण्यास सुरुवात केली असून याचा परिणाम शाळांमधील उपस्थितीवर होत आहे, तर शालेय वाहतुकीच्या वाहनातून प्रवास करणाचा विद्यार्थ्यांची संख्या रोडावली असल्याचे दिसून येत आहे. नाशिक शहरातील नेत्ररोग तज्ज्ञांच्या मते, पावसाळ्यात व्हायरल इन्फेक्शनमुळे डोळे येण्याचे प्रमाण वाढते. सध्या शहरात मोठ्या प्रमाणात डोळे येण्याची साथ पसरत आहे. नागरिकांनी काळजी घ्यावी. डोळे थंड पाण्याने धुवावे, कुटुबातील व्यक्तींनी रुमाल, टावेल स्वतंत्र वापरावा. सार्वजनिक ठिकाणी स्पर्श करू नये. हात स्वच्छ धुवत रहावे, अशा सूचना देण्यात आल्या आहेत.
अशी आहेत लक्षणे
दरम्यान डोळ्यांची साथ येत असताना याची लक्षणे देखील समजून घेतली पाहिजे. यात डोक्यात टोचणे खुपल्यासारखे होणे. डोळ्यांचा रंग लाल, गुलाबी होणे. जळजळ होते, तर खाज सुटते. सकाळी डोळ्यांच्या पापण्या एकमेकांना चिकटणे, डोळ्यांतून सारखे पाणी वाहणे, अशी लक्षणे दिसून येतात.
संबंधित बातमी :