शिर्डी : महाशिवरात्रीनिमित्त शिर्डीत साईदर्शनासाठी येणाऱ्या भाविकांसाठी साई प्रसादालयात साबुदाणा खिचडीचा महाप्रसाद देण्यात आला. तब्बल 15 टन साहित्याचा वापर यासाठी करण्यात आला. साई समाधीवर आज दिवसभर भगवान शंकराची प्रतिमा ठेवण्यात आली होती. साई बाबांच्या मूर्तीला कोट्यवधी रुपयांचे सोन्याचे दागिने आणि तुळशीमाळांचा साज चढवण्यात आला होता.
साईबाबांच्या दर्शनासाठी महाशिवरात्रीनिमित्त शिर्डीत भाविकांनी मोठी गर्दी केली. महाशिवरात्र आणि उपवासाचा दिवस लक्षात घेऊन भाविकांसाठी आज खास साबुदाणा खिचडीचा महाप्रसाद देण्यात आला.
सकाळी नाश्ता तसेच भोजनातही उपवासाची खिचडी देण्यात आली. साबुदाणा खिचडी, शेंगदाण्याची आमटी, बटाटा शिरा असे पदार्थ बनवण्यात आले होते. दिवसभरात 70 ते 80 हजार भाविकांनी महाप्रसादाचा लाभ घेतल्याच संस्थान प्रशासनाने सांगितलं आहे.
खिचडीचा प्रसाद बनवण्यासाठी 15 टन उपवासाच्या साहित्याचा वापर करण्यात आला. साबुदाणा 6 हजार 395 किलो, शेंगदाणे 4 हजार 687 किलो , तूप 993 किलो, साखर 340 किलो, बटाटे 2 हजार 490 किलो, हिरवी मिरची 424 किलो तर लाल मिरची 100 किलो असं साहित्य महाखिचडी प्रसाद बनवण्यासाठी वापरण्यात आलं. महाशिवरात्री आणि आषाढी एकादशी असं वर्षातून दोनदा प्रसाद भोजनात उपवासाची खिचडी देण्यात येते.
शिर्डी पंचक्रोशीतील स्थानिक भाविक आवर्जुन या प्रसादरुपी खिचडीचा आस्वाद घेण्यासाठी येत असतात. तसेच देशभरातून आलेल्या भाविकांनाही आज प्रसाद भोजनात साबुदाणा खिचडी मिळत असल्याने त्यांनीही समाधान व्यक्त केलं.