कोल्हापूर : कोल्हापूरच्या रेणुका मंदिरात पुजाऱ्याला मारहाण करणाऱ्या गावगुंडांना अखेर अटक करण्यात आली आहे. मारहाण करणाऱ्या दहा जणांना पोलिसांनी अटक केली आहे. दहा जणांना कोर्टात हजर केलं जाणार आहे. रेणुका मंदिरात भक्तांनी दान केलेले पैसे जबरदस्तीने घेताना अडवणूक केल्याने मंदिराच्या पुजाऱ्याला गुंडांनी जबर मारहाण केली होती. या मारहाणीत दोघे गंभीर जखमी झाले आहेत. हा सर्व मारहाणीचा प्रकार सीसीटीव्हीत कैद झाला आहे. कोल्हापुरातील जवाहर नगर परिसरात देवी रेणुकाचं जागृत मंदिर आहे. या मंदिरात दररोज भाविकांची गर्दी असते. मंगळवारी देवीचा वार असल्यानं भाविक मोठ्ठी गर्दी करतात. देवीसाठी भक्तांनी दान केलेले पैसे याच परिसरातील काही गुंड मंदिरात येऊन जबरदस्तीनं घेऊन जातात.

कोल्हापुरातील रेणुका मंदिरात गुंडांचा हैदोस, पुजाऱ्यांना जबर मारहाण

मंदिराचे पुजारी विलास मेढे गाभाऱ्यासमोर भक्तांना प्रसाद देत होते. यावेळी अनेक भक्तांनी देवी समोर रोख रक्कम दान केली होती. याच दरम्यान या परिसरातील गुंड मंदिरात घुसले. त्यांनी सुरुवातीला पुजारी विलास यांना पैसे देण्यासाठी धमकावलं, तर काही वेळातच अचानकपणे त्यांनी जबर मारहाण सुरु केली. गाभाऱ्यात असणाऱ्या अॅल्युमिनियमच्या परडीनंही जबर मारहाण केली. ही मारहाण सुरु असताना त्यातील काही गुंडांनी पुजारी विलास यांना मंदिराबाहेर फरफटत आणलं आणि तिथेही लाथा-बुक्के आणि काठीने मारहाण केली. ही मारहाण सोडवण्यासाठी गेलेल्या अन्य दोघांनाही मारहाण झाल्याने तेही जखमी झाले आहेत. या घटनेची माहिती राजारामपुरी पोलिसांना दिल्यानंतर ते तातडीने घटनास्थळी दाखल झाले. या परिसरात गावगुंडाचा नियमित त्रास सुरु आहे, मात्र पोलिस याकडे दुर्लक्ष करत आहेत. त्यामुळे नागरिकांमध्ये संताप व्यक्त होत आहे.