मुंबई : राज्यातील 12 कोटी जनतेला अत्याधुनिक डिजिटल सेवेद्वारे गुणवत्तापूर्ण, जलद आणि सुलभ आरोग्यसेवा मिळणार आहे. यासंदर्भात स्वित्झर्लंडमधील दावोस येथे (davos World Economic Forum) हिताची एमजीआरएम नेटशी (hitachi mgrm net ltd) भागीदारी करण्यात आली असून त्यामुळे आरोग्य क्षेत्रात परिवर्तन होईल असे मुख्यमंत्री एकनाथ शिंदे म्हणाले.
एमएसटीएआर या प्लॅटफॉर्मच्या माध्यमातून आरोग्य सेवा देण्यासाठी कंपनीच्या वरिष्ठ अधिकाऱ्यांसमवेत मुख्यमंत्र्यांनी विविध मुद्द्यांवर काल चर्चा केली. एमएसटीएआर हा एक नाविन्यपूर्ण प्लॅटफॉर्म असून आयुष्मान भारत डिजिटल मिशन अनुरूप डिजिटल आरोग्य सेवा राज्यातील जनतेला देण्याची सुविधा यामध्ये आहे.
आधुनिक आरोग्य सेवा मिळेल
या भागीदारीमुळे राज्यातील आरोग्याच्या पायाभूत सुविधांमध्ये क्रांती होईल. नागरिकांना कोणत्याही अडथळ्याशिवाय दर्जेदार आणि आधुनिक आरोग्य सेवा मिळेल. शिवाय प्रत्येकाचे आरोग्य रेकॉर्ड अद्ययावत ठेवण्यात येईल. रिमोट पद्धतीने वैद्यकीय चाचण्या व तपासणी करण्यात येतील. यासंदर्भात मुख्यमंत्री म्हणाले की,अत्याधुनिक तंत्रज्ञानाचा वापर करून नागरिकांना चांगली आरोग्य सेवा देणे हे आमचे उद्दिष्ट्य आहे. यामुळे या सेवा देण्याचा दर्जा उंचावण्यास मदत होईल. हिताची एमजीआरएम नेटचा एमएसटीएआर प्लॅटफॉर्म हा नाविन्यपूर्ण उपक्रम आहे.आरोग्य सेवा देण्यातील अडचणी ओळखून सुलभरीत्या या सेवा देण्याची व्यवस्था यात विकसित करण्यात आली आहे. या भागीदारीमुळे राज्यातील आरोग्याच्या पायाभूत सुविधांमध्ये मोठ्या प्रमाणात तांत्रिक प्रगती होऊन त्या अधिक कार्यक्षम बनतील.
8 हजार कोटी रुपयांच्या गुंतवणूकीचा करार -
जागतिक आर्थिक परिषदेत मुख्यमंत्री एकनाथ शिंदे यांच्या प्रमुख उपस्थितीत 'महाप्रित' आणि हिरो फ्युचर एनर्जी यांच्यात 8 हजार कोटी रुपयांच्या गुंतवणूकीच्या सामंजस्य करारावर स्वाक्षरी करण्यात आली. महाराष्ट्रात हरित आणि स्वच्छ ऊर्जेसाठी सोलर, कार्बन कॅप्चर, ग्रीन हायड्रोजन यासारख्या तंत्रज्ञानाचा अधिक सुलभतेने वापर करण्यासाठी हा सामंजस्य करार करण्यात आला. यावेळी उद्योग मंत्री उदय सामंत यांच्यासह मान्यवर उपस्थित होते. 'महाप्रित' चे व्यवस्थापकीय संचालक डॉ. अमोल शिंदे यांनी या करारावर स्वाक्षरी केली.
40 हजार कोटींच्या करारावर स्वाक्षरी
दावोस येथे सुरू असलेल्या 54 व्या जागतिक आर्थिक परिषदेत मुख्यमंत्री एकनाथ शिंदे यांच्या उपस्थितीत 'महाप्रित' आणि 'ग्रीन एनर्जी 3000' यांच्यात 40 हजार कोटींच्या सामंजस्य करारावर स्वाक्षरी करण्यात आली. या करारांतर्गत राज्यातील सौर ऊर्जा धोरणाला अनुसरून सौर ऊर्जा पार्क, पवन ऊर्जा, हायब्रीड पॉवर प्लांटस उभारण्यात येणार आहेत. पहिल्या टप्प्यात एक हजार मेगावॅट सौर ऊर्जा निर्मितीचे उद्दिष्ट असून ही क्षमता सोलर, हायब्रीड एनर्जी आणि बॅटरी एनर्जी स्टोरेजच्या सहाय्याने १० हजार मेगावॅटपर्यंत वाढवण्याचे उद्दिष्ट समोर ठेवण्यात आले आहे. 'महाप्रित' चे व्यवस्थापकीय संचालक डॉ. अमोल शिंदे यांनी या करारावर स्वाक्षरी केली.