CWG 2018 : महाराष्ट्रातील पदकविजेत्यांना सरकारकडून रोख इनाम
एबीपी माझा वेब टीम | 12 Apr 2018 07:45 AM (IST)
राष्ट्रकुल स्पर्धेतील सुवर्णपदक पटकावणाऱ्या खेळाडूंना 50 लाख, रौप्यपदक विजेत्यांना 30 लाख, तर कांस्यपदक विजेत्या खेळाडूंना 20 लाख रुपयांचं रोख इनाम देऊन गौरवण्यात येईल.
मुंबई : ऑस्ट्रेलियातील गोल्ड कोस्टमध्ये सुरु असलेल्या 21 व्या राष्ट्रकुल क्रीडा स्पर्धेतील पदकविजेत्या खेळाडूंना रोख इनाम देण्याची घोषणा महाराष्ट्र शासनाच्या वतीने करण्यात आली आहे. राष्ट्रकुल स्पर्धेतील सुवर्णपदक पटकावणाऱ्या खेळाडूंना 50 लाख, रौप्यपदक विजेत्यांना 30 लाख, तर कांस्यपदक विजेत्या खेळाडूंना 20 लाख रुपयांचं रोख इनाम देऊन गौरवण्यात येईल. पदकविजेत्या खेळाडूंच्या प्रशिक्षकांना साडेबारा लाख (सुवर्ण), साडेसात लाख (रौप्य) आणि पाच लाख (कांस्य) रुपयांचं पारितोषिक देण्यात येईल. या स्पर्धेत टेबल टेनिसचं सांघिक सुवर्णपदक विजेत्या भारतीय महिला संघात महाराष्ट्राच्या मधुरिका पाटकर, पूजा सहस्रबुद्धे (दोघीही ठाण्याच्या रहिवासी) आणि सनील शेट्टी यांचा समावेश आहे. तसंच भारताच्या सुवर्णविजेत्या बॅडमिंटन संघात मुंबईतील पार्ले भागात राहणाऱ्या चिराग शेट्टीचा समावेश आहे. त्याशिवाय लग्नानंतर मुंबईतील गोरेगावात वास्तव्य असलेली नेमबाज हीना सिद्धू हिने एक सुवर्ण आणि एक रौप्यपदक पटकावलं आहे.