कोरोनाच्या सर्वाधिक चाचण्या महाराष्ट्रात, दिवसाला साडे पाच हजार चाचण्या करण्याची क्षमता : आरोग्यमंत्री राजेश टोपे

राज्यात सध्या 8 खासगी प्रयोगशाळांमधून चाचण्या केल्या जात असून त्याद्वारे दररोज सुमारे 2800 चाचण्या केल्या जाऊ शकतात.

मुंबई : राज्यात कोरोना चाचण्यांची सुविधा देशात सर्वाधिक महाराष्ट्रात असून 13 शासकीय आणि 8 खासगी प्रयोगशाळांच्या माध्यमातून दररोज 5500 चाचण्या करू शकतो, अशी माहिती आरोग्यमंत्री राजेश टोपे यांनी दिली आहे. ज्यात आतापर्यंत 6323 जणांच्या चाचण्या करण्यात आल्या असून 5911 जणांचे नमुने निगेटिव्ह आल्याचे त्यांनी सांगितले.

कोरोनाचा वाढता प्रादुर्भाव लक्षात घेता राज्यात चाचण्यांची सुविधा वाढविण्यासाठी सुरूवातीपासून केंद्र शासनाकडे सातत्याने पाठपुरावा करण्यात आला. राज्याच्या मागणीची दखल घेऊन केंद्र शासनाने शासकीय महाविद्यालय आणि खासगी प्रयोगशाळांना चाचण्यांसाठी परवानगी देण्यात आली आहे. सध्या राज्यात 13 शासकीय प्रयोगशाळांच्या माध्यमातून कोरोनाची चाचणी केली जात आहे. त्याद्वारे दररोज 2300 चाचण्या केल्या जाण्याची क्षमता आहे. आता त्यामध्ये अजून 3 शासकीय प्रयोगशाळांना मान्यता देण्यात येणार असून राज्यात शासकीय प्रयोगशाळांची संख्या 16 होईल, असे आरोग्यमंत्र्यांनी सांगितले.

Coronavirus | तरुणांना कोरोनाचा सर्वाधिक धोका

राज्यात सध्या 8 खासगी प्रयोगशाळांमधून चाचण्या केल्या जात असून त्याद्वारे दररोज सुमारे 2800 चाचण्या केल्या जाऊ शकतात. मात्र सध्या तरी राज्यात मोठ्या प्रमाणावर चाचण्या करण्याची आवश्यकता नसून कोरोना उपचाराच्या प्रोटोकॉलनुसार चाचण्या केल्या जात असल्याचे आरोग्यमंत्री टोपे यांनी संगितले. राज्यात कोरोनाला सामोरे जाण्यासाठी आरोग्य यंत्रणेकडे पुरेशी साधनसामुग्री उपलब्ध असल्याचे आरोग्यमंत्र्यांनी सांगितले. राज्यात सध्या एन 95 मास्क दीड लाख एवढे उपलब्ध असून सुमारे 35 हजार पीपीई कीटस् तर 21 लाख 70 हजार ट्रीपल लेअर मास्क उपलब्ध आहेत. अजुनही ही साधनसामुग्री उपलब्ध करून देण्यासाठी राज्य शासनाकडून प्रयत्न केले जात आहेत, असेही त्यांनी सांगितले.

राज्यात कोरोनाबाधीत रुग्णांवर महात्मा फुले जनआरोग्य योजनेच्या माध्यमातून मोफत उपचार करण्यात येणार आहे. राज्यात या योजनेमध्ये सुमारे एक हजार रुग्णालये सहभागी होणार आहेत त्याद्वारेही कोरोनाच्या रुग्णांवर उपचार केले जातील, असेही आरोग्यमंत्र्यांनी संगितले.

संबंधित बातम्या :