बीड : पेट्रोलच्या किंमती आवाक्याबाहेर जात असल्याने सरकारकडून इलेक्ट्रिक वाहनांना सबसिडी देऊन चालना देण्याचे धोरण अवलंबलं जात आहे. परंतु सरकारच्या या धोरणांना ओला कंपनीकडून हरताळ फासला जात आहे. बीड जिल्ह्याच्या परळीतील ग्राहक सचिन गित्ते यांनी खरेदी केलेली इलेक्ट्रिक दुचाकी अवघ्या सहा दिवसात बंद पडली ती काही केल्याने पुन्हा सुरु झालीच नाही. कंपनीकडून कोणताही प्रतिसाद येत नसल्याने त्रस्त ग्राहक सचिन गित्ते यांनी बंद पडलेली दुचाकी गाढवाला बांधत परळीतील रस्त्यावरुन ओढत आगळ्या वेगळ्या पद्धतीने निषेध नोंदवला. ओला कंपनीच्या या दुचाकी फसव्या असल्याने त्या घेऊ नयेत, असं आवाहन त्यांनी यावेळी जनतेला केलं.


परळी इथले व्यापारी सचिन गित्ते यांनी 16 सप्टेंबर 2021 रोजी 20 हजार रुपये भरत ओला कंपनीची दुचारी ऑनलाईन बुकिंग केली. 21 जानेवारी 2022 रोजी उरलेले 65 हजार रुपये भरल्यानंतर त्यांना 24 मार्च रोजी ही दुचाकी गित्ते यांच्या ताब्यात देण्यात आली. पण अवघ्या सहा दिवसानंतर ही दुचाकी बंद पडली. त्यानंतर गित्ते यांनी कंपनीकडे संपर्क साधला. कंपनीचा मेकॉनिक येऊनही दुचाकी सुरु झाली नाही. कंपनीकडून हजारो गाड्यांची विक्री होत असताना कुठेच डिलर अथवा तालुका, जिल्हा, विभागीय स्तरावर शोरुम नाहीत. सचिन गित्ते कस्टमर केअर नंबरवर वारंवार फोन करुनही उडवाउडवीची उत्तरे मिळत आहेत. 


पैसे देऊन घेतलेली दुचाकी बंद पडल्याने आणि कंपनीकडून कोणताही प्रतिसाद न मिळाल्याने त्रस्त झालेल्या सचिन गित्ते यांनी रविवार 24 एप्रिल रोजी बंद पडलेली दुचाकी गाढवाने ओढत गांधीगिरी पद्धतीने निषेध नोंदवला. गाढवाच्या पाठीवर ओला कंपनीचा निषेध असलेले फलक लावून ओला या फसव्या कंपनीपासून सावध राहावे, ओला कंपनीच्या दुचाकी खरेदी करु नका, असे जाहीरपणे सांगत राणी लक्ष्मीबाई टॉवर परिसरातील रस्त्यावरुन गाढवाच्या पाठीमागे दुचाकी बांधत आगळ्या वेगळ्या पध्दतीने निषेध नोंदवला. सचिन गित्ते यांच्या या निषेधाची परळी शहरात चांगलीच चर्चा होत आहे.


ग्राहक मंचाकडे तक्रार
अवघा सहा दिवसात ओला कंपनीची दुचाकी बंद पडली. त्यानंतर दोन महिने कंपनीशी संपर्क साधूनही दुरुस्ती अथवा बदल्यात दुचाकी न मिळाल्याने आपण ग्राहक मंचाकडे तक्रार केली आहे. हजारो कोटी रुपयांचा व्यवहार करणाऱ्या ओला कंपनीकडून ग्राहकांना कोणतेही आर्थिक संरक्षण नसल्याने, सरकारने या कंपनीची चौकशी करुन कारवाई करावी याबाबत ग्राहक मंचात तक्रार केली आहे, असं सचिन गित्ते यांनी सांगितलं.