Khalistani Terrorist Harvinder Singh Rinda : हरियाणात अटक करण्यात आलेल्या दहशतवाद्यांचा महाराष्ट्र एटीएस (Maharashtra ATS) ताबा घेणार आहे. खलिस्तानी दहशतवादी हरविंदर सिंह रिंदाच्या 4 हस्तकांना करनालमधून अटक करण्यात आली होती. दरम्यान, या दहशतवाद्यांचा म्होरक्या रिंदा सध्या पाकिस्तानातील इस्लामाबाद शहरात असून यापूर्वी तो लाहोरमध्ये होता, अशी माहिती सूत्रांनी दिली होती. तसेच, तो पाकिस्तानातून भारताविरोधात दहशतवादी कट रचत असल्याचा धक्कादायक खुलासा तपासातून झाला होता.
खलिस्तानी दहशतवादी रिंदानंच तेलंगणामध्ये RDX पाठवलं
खलिस्तानी दहशतवादी हरविंदर सिंह रिंदानंच (Harvinder Singh Rinda) तेलंगणामध्ये आरडीएक्स पाठवलं असल्याचा धक्कादायक खुलासा पोलीस तपासात झाला होता. स्लीपर सेलच्या मदतीनं हरविंदर सिंह रिंदा यानं आरडीएक्स पाठवलं असल्याची माहिती दिली आहे. हे आरडीएक्स नांदेडमध्ये पाठवण्यात आल्याची माहिती सुरुवातीला होती, पण त्यानंतर हाती आलेल्या माहितीनुसार, हे आरडीएक्स तेलंगणामध्ये पाठवण्यात आलं होतं.
हरियाणाच्या कर्नाल जिल्ह्यातील बस्तारा जिल्ह्यातून 4 दहशतवाद्यांना अटक केल्यानंतर आणि त्यांच्याकडून मिळालेल्या माहितीनंतर, महाराष्ट्र पोलीस सतर्क झाले आहेत. महाराष्ट्र पोलीस दहशतवाद्यांच्या पूर्वीच्या आरडीएक्सच्या खेपेचा शोध घेण्याचा प्रयत्न करत आहेत. गेल्या वर्षी डिसेंबरमध्ये झालेल्या कथित मानवी स्फोटामागे हरविंदर सिंह रिंदाचाच हात असल्याचं लुधियाना येथील न्यायालयाकडून सांगण्यात येत आहे, त्यादरम्यान रिंदानं स्फोटापूर्वी संशयितांशी चार संभाषणं केली असल्याचंही समोर आलं आहे.
दरम्यान, हरियाणात अटक करण्यात आलेल्या चार अतिरेक्यांचा म्होरक्या हरविंदर सिंह रिंदा याच्या नांदेडमधील साथीदारांच्या घरी धाडसत्र सुरू करण्यात आलं आहे. नांदेड पोलीस दलाचे पोलीस उपमहानिरीक्षक निसार तांबोळी यांच्या आदेशानुसार, संशयितांच्या घरी झडतीची मोहीम राबवली जात आहे. काल हरियाणातील कर्नाल चेक पोस्टवर चार अतिरेक्यांना अटक केली होती. यावेळी चौघांकडून मोठ्या प्रमाणात शस्त्रसाठी जप्त करण्यात आला होता. नांदेड आणि आदीलाबादमध्ये मोठा घातपात करण्याचा कट असल्याचं पोलीस तपासात उघड झालं आहे. सध्या पोलीस याप्रकरणी अधिक तपास करत आहेत. तसेच, आता महाराष्ट्र एटीएस अटकेत असलेल्या दहशतवाद्यांना ताब्यात घेणार आहे.